Kâ Wîcišânitocik

Hänsel_und_Gretel
Weškac  ante cîkâske kitimâkisit onôtâhtikwew kî wîci-tašîhkemew wîwa nešta ot awâšimiša kâ nîšilici. Peyakwâw mâka e takwâkihk kî nôhtehkatâniwan. Ana nâpew môla ohci kî ašamew wîwa nešta ot awâšimiša. Anihi wîwa kî ayâkwâmimikow kici kawahkatelici ot awâšimišiwâwa. Peyakwâw mâka e tipiskâlik kî itikow wîwa kici išiwilât anihi awâšiša ante nôhcimihk kici nakatâkaniwilici.

Okosisimâw mâka kâ kâhcici-pehtahk animeliw e itwâniwanilik kâ wîhtamawât omisa. Âta mâka tâpiškôc kâ koštâcicik keyâpic kî wawelîwak kâ wîcišânitocik. Kâ âpihtâ-tipiskâlik e išpakocinilici tipiski-pîsimwa, kayâm kî nisâwîw ana nâpešiš kici walawît e wî natawi-mâmôškinât asiniya kâ wâpâpiskisilici. Kî sâkaškinatâw opwâkitim.

Eko kâ kekišepâyâlik, aniki awâšišak kî kihciwilikowak ohtâwîwâw e wî nâcinihtelici. Mekwâc mâka e pimohtet nâpešiš, kîmôc kî pâhpakitinew asiniya kici kiskinawâcihtât omeskanaw.

Wâhlaw ante e mištikoskâlik, kî kotawatew ana ohtâwîmâw anihi ot awâšimiša eko kâ kawišimonahât. Mekwâc mâka e nipâlici, kî nakatew anihi awâšiša. Âlahkonâwa piko kî nakatamawew kici mîcisolici. šay mâka kâ wawelîcik aniki awâšišak nakiskaw piko kî nipâšiwak. Eko kâ kîšikâštelik, kî nôsonehwewak anihi asiniya kâ wâsihkwâpiskisilici kici mitimecik. Ispi kâ wâpamât ana wîwimâw anihi awâšiša e takošinilici kî itwâsow e milwelihtamwât,  piko mâka tâpwe kî kišiwelimew e kî takošinilici.

Mîna kâšikâlik kî itašawâtew onâpema mîna kici itohtahâlici ot awâšimišiwâwa ante nôhcimihk. Awasite wâhlaw kî itohtahew ot awâšimiša ana nâpew. Ekâ mâka kâ ayâwât asiniya ana nâpešiš, kî pikiškipitew ot âlahkonâma kici kiskinawâcihtât omeskanaw. Piko mâka pilešîša kî moweliwa anihi âlahkonâwa kâ pâhpakitinât. Môla mâka ohci kî miskam meskanâliw ana nâpešiš ke kî kîwecik.

Kâ wâpanilik mâka ana iškwešiš kî pisiskâpamew pilešîša e wâpisilici. Kî nôsonehwewak aniki awâšišak anihi pilešîša e ispihci-milohtawâcik pîliš e miskahkik wâskâhikaniliw kâ mâmaskâsinâkwanilikipan. Âlahkonâhk išinâkwanôpan anima wâskâhikan. Apahkwân mâka išinâkwanôpan kâ aspaštamâniwahk šôkâw kâ pimîwinâkwahk ohci. Eko aniki awâšišak kî pahkwehtamwak wâskâhikaniliw e ispihci-šîwatecik. Ispi kâ saskamocik, kî pehtawewak aweliwa e itikocik,

“Âpikošîšihk itihtâkosiw!

Awena mâcit ni wâskâhikaniliw?”

Kî âpahikâtew iškwâhtem, eko kâ nôkosit e walawîkâpawit kiše-iskwew e macinâkosit. Ana iskwew kî pâhpihkwelîštawew awâšiša eko kâ pîhtokahât. Kâ wâpamât e ispihci-šîwatelici, kî ašamew pôtina nešta mîniša. Eko kâ kawišimonahât.

Aniki kâ wîcišânitocik môla ohci-kiskelimewak anihi iskwewa kâ milo-tôtâkocik kihciwe kâ wîhtikôskwewilici! Mekwâc mâka kâ milohkwâmit ana nâpešiš, kî kihciwilikow anihi wîhtikôskwewa kici natawi-kipahokot ante kipahotôwikamikohk.

“Eko!” Kî itwew ana wîhtikôskwew, “nika tâhcipohâw kici mowak!”

Ana wîhtikôskwew kî itašawâtew anihi iškwešiša kici piminawelici e wî tâhcipohât nâpešiša. Aniki awâšišak kî natotamawewak kici wîhkwacihikocik, pišiškw mâka kî pâhpiliw anihi wîhtikôskwewa.

Ekâ kâ nahâpit ana kiše-iskwew mešakwani-kîšikâw kî kakwetinamwew ocihcîliw nâpešiša e natawâhât tepi-tâhcipolikwe. Peyakwâw oškaniškîšiliw kâ miskahk ana nâpešiš ante kipahotôwikamikohk, ewakwânimeliw kâ nîminamawât kâ peci-natawâhikot. Kâ kakwetinwât mâka animeliw oskaniliw, kî itelimew eško e osâmi-paskewelici anihi. Eko kâ ititisot, “Âta kâ ašamâkaniwit nâpešiš môla wî tâhcipow.” Tâpwe kî pômehew ana wîhtikôskwew.

Eko kâ kekišepâyâlik kî itašawâtew iškwešiša kici pîhtiteyâhtawîlici ante iškotehkânihk kici natawâhtâlici tepihkolelikwe iškoteliw. Iškwešiš mâka kî kakwecimew, “Tâni pâhtiteyâhtawîyân ante iškotehkânihk?”

Kâ kišiwâsit ana wîhtikôskwew kî iskwâhtawîw kici wâpahtilât tâni kici natawâhtâlici iškoteliw. Kîtahtawel mâka iškwešiš kî pîhtite-kâhtinew anihi maci-iskwewa ante iškotehkânihk.

Aniki awâšišak kî sâkaškinatâwak opwâkitimiwâwa kâ ohci-mâmôškinamwâcik omîšakisîwiniliw anihi wîhtikôskwewa eko kâ kîwecik. Pešoc mâka kî matâpewak ante e alakaškâkamâlik. Anta mâka šišôtew kî ihtâliwa wâpisiwa kâ mišikitilici kâ naskomolici kici âšôholikocik. Keka kî mâtâmewak kâ nîšicik animeliw meskanâliw kâ kiskelihtahkik.

Kî ohcikawâpiw ana onôtâhtikwew e ispihci-milwâtahk mîna e ohci-wâpamât ot awâšimiša. šay mâka kî kihcitišahwew wîwa kâ ohci-kiskelimât tâni e ispihci-macihtwâlici. Kî milwelihtamwak ana onôtâhtikwew e ispihci-pimâtisicik e pimâcihowâkewâcik animeliw omîšakisîwiniliw nehi wîhtikôskwewa.

Advertisements