Mehkoštotinešit

Little_Red_Riding_Hood_pg_8
Weškac kî ihtâw iškwešiš kâ sâkihikot misiwe aweliwa kâ kanawâpamikot. Ohkoma mâka mâwac kî sâkihikow nešta môla kî ihtakwaniliw kekwâliw ekâ ke ohci-mîlikot. Peyakwâw kî mîlikow kâ mihkwâlik aštotiniliw. Ewakwânimeliw môšak kâ kikiškahk e ispihci-miloškahk. Ewako wehci kî išinihkâtikosît Mehkoštotinešit.

Peyakwâw kî itikow okâwiya, “štam Mehkoštotinešiyan! Mâtikôwa âlahkonâw nešta šôminâpow. Itohtatamaw ôhi kôhkom. Âhkosiw nešta lîlamisîw kôhkom. Kata miloškâkow ômeliw mîcimiliw. Kihtohte eškwa ekâ e kišâštek. Wewelat mâka pimohte nešta ekâwîla patoteskanawehte ekâ ke ohci-pîkohtitâyan ôma pîwâpiskolâkan. Pîkohtinilike mâka môla kata ayâw kekwâliw kôhkom. Pîhtokeyane mâka, ekâwîla wani-kiskisi kici atamiskawat kôhkom nešta ekâwîla pisiskelihta kekwân pwâmoši atamiskawate.

“Nika ayâkwâmisîn,” kî itew Mehkoštotinešit e ašotamawât okâwiya. Ohkoma ante nôhcimihk kî tašîhkeliwa, wayeš nikotwâso-tipahikan otenâhk ohci. Eko kâ ati kotâwâskohahk Mehkoštotinešit kî nakiškawew mahîhkana. Môla ohci-kiskelimew Mehkoštotinešit tâni espihci-mâlâtisilici anihi mahîhkana.

“Milo-kîšikâw nama, Mehkoštotinešiyan?” Kî itwew

“Tâpwe milo-kîšikâw, Mahîhkan.”

“Tânte etohteyan wîpac kekišep, Mehkoštotinešiyan?”

“Nôhkom wîkihk.”

“Kekwân eyâyan ante kîwatihk?”

“Âlahkonâw nešta šôminâpow. Kî âlahkonâhkâniwan otâkošihk. Kâ kitimâkisit nôhkom kata ayâw kekwâliw e milwâlik awasite ke milwâcihikot.”

“Tânte wâkit kôhkom, Mehkoštotinešiyan?”

“Awasite ante nôhcimihk, âpihtawi-tipahikan wayeš. Šîpâ ante mištikominâhtikohk ihtakwaniliw wîki. Pešoc ante kâ ihtâcik aniki pakânâhtikwak. Cikema ki kiskelihten ita e wîkit.” kî naškwewašihew Mehkoštotinešit.

Ana mahîhkan kî ititisow, “Wâ malôkewakinâkosit awa iškwešiš! Awasite wîhkitišîtoke ispiš anihi nôtokewa! Kîmôc nika ayihtihtay tâpiskôc wî mowakwâwe.” Pitamâ mâka kî wîcewew Mehkoštotinešilici. Eko kâ itât, “Ki wâpahten-nâ, Mehkoštotinešiyan, tâni espihci-milwâšihki wâpikwaniya? Kekwân wehci ekâ ayitâpiyan? Nit itelihten nešta ekâ pehtawacik pilešîšak e nikamocik. Ki macelihtamônâkosin e pimohteyan tâpiskôc e itohteyan ante kiskinohamâtôwikamikohk. Môcikelihtamwak mâka kotakiyak aweniki ôte nôhcimihk e ihtâcik.”

Eko kâ tastasâpit Mehkoštotinešit. Ispi mâka kâ wâpahtahk animeliw pîsimweyâpîliw e išinâkwanilik e nîmîmakanilik nešta anihi wâpikwaniya kâ nihtâwikiniliki ante misiweskamik, kî ititisow, “Mâmôškinamawake wâpikwaniya nôhkom, tâpwe kika milwelihtamôpan. Keyâpac nika kesiskawâw nôhkom wesa wîpac nikî kihtohtân.” Eko kâ patoteskanawepahtât e nânatawâpikwanet. Tahtwâw mâka kâ manipitahk wâpikwanîliw mîna kotakîliw kî wâpahtam awasite e moštenahk. Keka mâka kâ lâwinâkosit ante ohci meskanâhk.

Eko mâka wîla mahîhkan kâ ispahtâwât wîkilîhk anihi ohkomimâwa. Eko kâ pâhpawahiket.

“Awena kîla?”

“Mehkoštotinešit,” kî naškwewašihew anihi ana mahîhkan. “Ki petamâkw šôminâpôliw nešta âlahkonâwa; Peci-âpahamaw iškwâhtemiliw.”

“Ohpâpiskina âtâpiskahikan,” kî tepwew e kišîwet ana ohkomimâw, “Wesâ ni lîlamisîn. Môla mâka nikî pasikôn.”

Ispi kâ ohpâpiskinahk aniheliw âtâpiskahikaniliw ana mahîhkan, kî âpahikâteliw iškwâhtemiliw. Eko kîšâc kâ nâtamwât onipewiniliw anihi ohkomimâwa kici mowât. Eko kâ poštiškamwât onipew-ayâniliw nešta ot aštotiniliw. Eko kâ wawelišihk ante nipewinihk nešta kâ âkawekipiciket.

Wîla mâka Mehkoštotinešit eškwa kî papâmipahtâw e mâmôškinahk wâpikwaniya. Ispi mâka ekâ kâ tepinahk wesâ mihcetw e kî mâmôškinahk, kî kiskisitotawew ohkoma. Eko mâka mîna kâ kihtohtet.

Kî koškwelihtam e wâpahtahk iškwâhtemiliw e âpahaštelik. Kâ pîhtoket mâka kî ititisow e amatisot, “Kišâštaw! Môšak ni milwelihtamwân e wâpamak nôhkom. Kekwâliw mâka wehci ekâ šâpelimak anohc?” Kî tepwew e kišwewet, “Kwey!” Piko mâka môla ohci-naškwewašihâkaniwiw. Eko kâ pîhtoket ante nipewikamikohk nešta kâ pâskekipiciket.

Ekota kâ pimišinilici anihi mahîhkana e akwanâhkwešinilici, nawac e mâmaskâsinâkosilici.

“Wesâ nôhkom!” Kî itew, “Tâpwe ki mâmahkihtawaken!”

“Awasite ke nahihtâtân nôsisim,” kî naškwewašihikow.

“Mâka nôhkom, tâpwe ki mâmahkacâpin!” kî itew.

“Awasite ke nahâpamitân nôsisim!”

“Mâka nôhkom, tâpwe ki mâmahkicihcen!”

“Awasite ke milo-wewakikwenitân!”

“Kišâštaw! Nôhkom, tâpwe ki mâmahkâpiten!”

“Awasite ke milo-môtân!”

Eko ketahtawel kâ wâniškâpahtât ana mahîhkan kici mowât Mehkoštotinešilici.

Eko kâ kîšpot ana mahîhkan, kî kawišimow. Kâ kawihkwašit mâka, kî ati matwehkwâmiw. Mekwâc kâ nipâlici, kî miyâškam aniheliw wâskâhikaniliw nâpew kâ natawahot. Kî ititisow ana nâpew, “Eko wesâ kišwewe-matwehkwâmiw ana nôtokew! Nika kakwecimâhtay natawelihtamokwe kekwâliw.” Eko kâ pîhtoket, kâ pešwâpahtahk animeliw nipewiniliw, kî wâpamew anihi mahîhkana kâ pimišinilici. “Ôte-nâ ki miskâtin omacihtwâw!” kî itwew. “šay weškac ki nânatawâpamitin!” Eko mwehc kâ wî pâskiswât anihi mahîhkana, kî itelihtam mâškoc eškwa e ililîwilici anihi ohkomimâwa. Kâ wî pimâcihât mâka anihi, môla ohci-pâskisikew. Kî tahkonam tahkohkomâniliw, eko kâ tâtošamwât watâliw anihi mahîhkana. Apišîš piko kâ mâtišiket, kî wâpahtam kâ mihkwâlik aštotiniliw. Apišîš mîn kâ mâtišiket, eko kâ walawî-kwâškohtilici anihi iškwešiša e mâtolici e itwelici, “Wesâ nikî sekisin e wani-tipiskâlik ante pîhcilaw.” Eko nâkešîš ana ohkomimâw weštawîla kâ peci-walawît e lehlepalit. Mehkoštotinešit mâka kî nâtew asiniya e kosikotilici ke âpacihât kici sâkaškinatâwât watâliw anihi mahîhkana. Ispi mâka kâ waniškât ana mahîhkan kî nipahišin e kakwe-kihcipahtât.

Eko kâ milwelihtahkik kâ ništicik. Ana kâ natawahot kî pahkonew anihi mahîhkana, eko kâ kîwehtahât anihi mahîhkaniwayâna. Ana ohkomimâw kî milwâcihikow e mowât anihi âlahkonâwa nešta e minihkwet aniheliw šôminâpôliw kâ petamâkot Mehkoštotinešilici. Ana mâka iškwešis kî ititisow, “Môla wîskâc nika ohci-patoteskanawehtân e peyakoyân ante nôhcimihk.”

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s