Kî owacištoniwak pilešîšak anite otâpânikamikohk. Peyakwâw, kî walawîlâwak onîkihikomâwak e wî nâcimîcimewâcik kici ašamâcik oc awâšimišiwâwa. Nakiskaw mâka kî nakatâkaniwiwak aniki awâšišak.
Nâkešîš mâka kî peci-kîwelâw ohtâwîmâw. “Tâni kâ ihkihk?” Kî itwew. “Awena kâ âhkohikoyekw? Mwehci e koštâciyekw kit išinâkosinâwâw.”
“Nôhtâ!” kî itwewak, “Awesîs kâ mišta-koštâsinâkosit kî takošin. Nâšic kî peci-mâmahkacâpiw e peci-kanawâpahtahk ki wacištoninâhk. Nâšic nikî koštâcihikonân!
“Kišâštaw!” kî itwew ana ohtâwîmâw, “Tânte kâ itohtet?”
“Nete kî itohtew!” kî itewak
“Eškwa pitamâ!” kî itwew ana ohtâwîmâw, “Nika nânatawâpamâw. Ekâwîla âlimelihtamokw, nit awâšimišitikw! Nika atimahwâw,” kî itwew. Eko kâ kihcilât.
Ispi mâka kâ sâkewelât, kî wâpamew kâ pimohtelici anihi mišâpišiwa. Môla mâka ohci-koštâciw ana pilešîš. Kî twehototamwew anta ospiskwanilîhk anihi mišâpišiwa. Eko kâ ati-kitahamawât e itwet, “Kekwân wehci takošiniyan nîkinânihk e koštâcihacik nic awâšimišak?” Piko mâka môla pisiskâtikow anihi mišâpišiwa.
Ana mâka kâ kišwewet pilešîš âhcipiko kî kitahamawew ohci e itwet, “Môla itelihtâkwan kici ayihtâyan ôta! Mîn mâka takošiniyane kika wâpahten! Môla tâpwe kiwî ihtôtâtin,” kî itwew e ohpikâtepalihot, “piko mâka kika nâtwâyâwikaneškâtin!
Eko kâ kîwelât ante o wacištonihk. Keka kî itwew, “Ekote nic awâšimišitikw! Nikî kiskinohamawâw ana awesîs ekâ mîna ke ohci-takošihk.”
Kepin's Cree Language Blog 
