ᑳ ᓂᔥᑎᐧᑖᐤ ᑰᐦᑰᔑᔕᒡ

Three_little_pigs_and_mother_sow_-_Project_Gutenberg_eText_15661
ᒌ ᐃᐦᑖᐤ ᐯᔭᐧᑳᐤ ᓅᔐ ᑰᐦᑰᔥ ᑳ ᒋᔐᔨᓃᐧᐃᑦ ᐁᑳ ᑳ ᐃᔅᐸᔨᐧᐋᑦ ᒉᒌ ᐊᔕᒫᑦ ᐅᑦ ᐊᐧᐋᔑᔒᒻᐦ ᑳ ᓂᔥᑎᔨᐧᑖᐤᐦ᙮ ᒌ ᒋᐦᒋᑎᔕᐦᐧᐁᐤ ᒫᒃ ᐸᐦᑳᓐ ᒉᒌ ᐱᒫᒋᐦᐅᔨᐧᑖᐤᐦ᙮ ᐊᓂᐦᐁ ᒫᒃ ᓃᔥᑕᒻ ᑳ ᒋᐦᑐᐦᑌᑦ ᒌ ᓇᒋᔥᑲᐧᐁᐤ ᐃᔨᓂᐤᐦ ᑳ ᐊᔮᔨᒡᐦ ᒪᔥᑯᔒᐦᑳᓂᔨᐤ᙮ ᒌ ᐃᑌᐤ ᒫᒃ, ᐯᒋ ᒦᔨᐦ ᒫ ᒋ ᒪᔥᑯᔒᐦᑳᓐ ᒉᒌ ᐧᐋᔅᑳᐦᐃᑲᓂᐦᑳᒉᔮᓐ᙮

ᐁᐧᐊᒄ ᑖᐧᐯ ᑳ ᐃᐦᑑᑕᒥᔨᒡᐦ ᐊᓂᔨᐤᐦ ᓈᐯᐤᐦ, ᐁᒄ ᑳ ᐧᐋᔅᑳᐦᐃᑲᓂᐦᑳᒉᑦ ᐊᓐ ᑰᐦᑰᔑᔥ᙮ ᒉᒃ ᒫᒃ ᑳ ᐅᑎᐦᑕᐧᒫᑦ ᒪᐦᐄᐦᑲᓐ ᐅᐧᐋᔅᑳᐦᐃᑲᓂᒥᔩᐦᒡ᙮ ᑳ ᐹᐦᐹᐧᐊᐦᐃᒉᑦ ᒫᒃ ᒌ ᐃᐧᑌᐤ, ᑰᐦᑰᔑᔥ! ᐯᒋ ᐋᐸᐦᐊᒪᐤᐦ ᒫ ᐃᔥᐧᑳᐦᑌᒻ ᒉᒌ ᐲᐦᑐᒉᔮᓐ!

ᓇᒪᐧᐄᔾ ᐧᐄᔅᑳᑦ! ᒌ ᐃᐧᑌᐤ ᐊᓐ ᑰᐦᑰᔑᔥ᙮

ᒌ ᓇᔥᐧᑫᐧᐊᔑᐦᐁᐤ ᒫᒃ ᒪᐦᐄᐦᑲᓐ, ᐁᑳ ᐧᐄ ᐋᐸᐦᐊᒪᐧᐃᔭᓀ, ᓲᐦᒃ ᓂᑲ ᐴᑖᑌᓐ ᒋ ᐧᐋᔅᑳᐦᐃᑲᓂᒻ ᒉᒌ ᑲᐧᐋᔥᑎᑖᔮᓐ!

ᒉᒃ ᒥᔥᑕᐦᐃ ᑳ ᐃᔅᑯᑖᒧᐧᐋᑦ, ᑳ ᐴᑖᑕᒸᑦ, ᓀᔥᑦ ᑳ ᑲᐧᐋᔥᑎᑖᐧᐋᑦ ᐅᐧᐋᔅᑳᐦᐃᑲᓂᒥᔨᐤ᙮ ᑖᐧᐯ ᒫᒃ ᑳ ᒧᐧᐋᑦ ᐊᓂᔨᐤᐦ ᑰᐦᑰᔑᔕ᙮

Three_little_pigs_1904_straw_house
ᐊᓐ ᒫᒃ ᑯᑕᒃ ᑰᐦᑰᔑᔥ ᑳ ᒋᐦᑐᐦᑌᑦ ᒌ ᓇᒋᔥᑲᐧᐁᐤ ᐃᔨᓂᐤᐦ ᑳ ᐊᔮᔨᒡᐦ ᒥᐦᒉᑦ ᓃᐱᓯᔮᐦᑎᐧᑲ᙮ ᒌ ᐃᑌᐤ ᒫᒃ, ᐯᒌ ᒦᔨᐦ ᒫ ᒋ ᓃᐱᓯᔮᐦᑎᑯᒻᐦ ᒉᒌ ᐧᐋᔅᑳᐦᐃᑲᓂᐦᑳᒉᔮᓐ᙮

ᐁᐧᐊᒄ ᑖᐧᐯ ᑳ ᐃᐦᑑᑕᒥᔨᒡᐦ ᐊᓂᔨᐤᐦ ᓈᐯᐤᐦ, ᐁᒄ ᑳ ᐧᐋᔅᑳᐦᐃᑲᓂᐦᑳᒉᑦ ᐊᓐ ᑰᐦᑰᔑᔥ᙮ ᒉᒃ ᑳ ᑕᑯᔑᐦᒃ ᒪᐦᐄᐦᑲᓐ ᐁ ᐃᑖᑦ, ᑰᐦᑰᔑᔥ! ᐯᒋ ᐋᐸᐦᐊᒪᐤᐦ ᒫ ᐃᔥᐧᑳᐦᑌᒻ ᒉᒌ ᐲᐦᑐᒉᔮᓐ!

ᓇᒪᐧᐄᔾ ᐧᐄᔅᑳᑦ! ᒌ ᐃᐧᑌᐤ ᑰᐦᑰᔑᔥ᙮

ᐁᑳ ᐧᐄ ᐋᐸᐦᐊᒪᐧᐃᔭᓀ, ᓲᐦᒃ ᓂᑲ ᐴᑖᑌᓐ ᒋ ᐧᐋᔅᑳᐦᐃᑲᓂᒻ ᒉᒌ ᑲᐧᐋᔥᑎᑖᔮᓐ!

ᒉᒃ ᒥᔥᑕᐦᐃ ᑳ ᐃᔅᑯᑖᒧᐧᐋᑦ, ᑳ ᐴᑖᑕᒸᑦ, ᓀᔥᑦ ᑳ ᑲᐧᐋᔥᑎᑖᐧᐋᑦ ᐅᐧᐋᔅᑳᐦᐃᑲᓂᒥᔨᐤ᙮ ᑖᐧᐯ ᒫᒃ ᑳ ᒧᐧᐋᑲᓂᐧᐃᑦ ᐧᐁᔥᑕᐧᐄᔾ᙮

ᐊᓐ ᒫᒃ ᒫᐦᒋᑌᔾ ᑰᐦᑰᔑᔥ ᒌ ᓇᒋᔥᑲᐧᐁᐤ ᐃᔨᓂᐤᐦ ᑳ ᐊᔮᔨᒡᐦ ᒥᐦᒉᑦ ᐊᓯᓃᐦᑳᓐᐦ᙮ ᒌ ᐃᑌᐤ, ᐯᒋ ᒦᔨᐦ ᒫ ᐊᓂᔨᐤᐦ ᐊᓯᓃᐦᑳᓐᐦ ᒉᒌ ᐧᐋᔅᑳᐦᐃᑲᓂᐦᑳᒉᔮᓐ᙮

Three_little_pigs_-_third_pig_builds_a_house_-_Project_Gutenberg_eText_15661
ᒌ ᐧᐋᔅᑳᐦᐃᑲᓂᐦᑳᒉᐤ ᑲᔭᐹ ᑳ ᐅᐦᒋ ᒦᔨᑯᑦ ᐊᓂᔨᐤᐦ ᐊᓯᓃᐦᑳᓐᐦ ᐊᓂᔨᐤᐦ ᐃᔨᓂᐤᐦ᙮ ᒉᒃ ᒌ ᑕᑯᔑᓄ ᒪᐦᐄᐦᑲᓐ ᐁ ᐃᑖᑦ ᐧᒣᐦᒡ ᑳ ᐃᑖᑦ ᑯᑕᒃᐦ ᑰᐦᑰᔑᔕ, ᐯᒋ ᐋᐸᐦᐊᒪᐤᐦ ᒫ ᐃᔥᐧᑳᐦᑌᒻ ᒉᒌ ᐲᐦᑐᒉᔮᓐ!

ᓇᒪᐧᐄᔾ ᐧᐄᔅᑳᑦ!

ᐁᑳ ᐧᐄ ᐋᐸᐦᐊᒪᐧᐃᔭᓀ, ᓲᐦᒃ ᓂᑲ ᐴᑖᑌᓐ ᒋ ᐧᐋᔅᑳᐦᐃᑲᓂᒻ ᒉᒌ ᑲᐧᐋᔥᑎᑖᔮᓐ!

ᒉᒃ ᒥᔥᑕᐦᐃ ᑳ ᐃᔅᑯᑖᒧᐧᐋᑦ ᓀᔥᑦ ᒥᐦᒉᐧᑖᐤ ᑳ ᐴᑖᒋᒉᐧᐋᑦ᙮ ᓲᐦᒃ, ᓲᐦᒃ, ᓲᐦᒃ ᒌ ᐴᑖᑕᐧᒣᐤ᙮ ᒥᒄ ᒫᒃ ᓇᒪᐧᐄᔾ ᐅᐦᒋ ᒌ ᑲᐧᐋᔥᑎᑖᐧᐁᐤ ᐊᓂᔨᐤ ᐅᐧᐋᔅᑳᐦᐃᑲᓂᒥᔨᐤ᙮ ᐃᔥᑯᑕᒃ ᑳ ᒋᔅᒉᔨᐦᑕᐦᒃ ᐁᑳ ᐅᐦᒋ ᒌ ᑲᐧᐋᔥᑎᑖᐧᐋᑦ, ᒌ ᐃᐧᑌᐤ, ᑰᐦᑰᔑᔥ! ᓂ ᒋᔅᒉᔨᐦᑌᓐ ᑖᓂᑕ ᐧᐁᑎᓰᐦᑳᓂᔅᑳᒡ᙮

ᑖᓂᑌ? ᐃᐧᑌᐤ ᐊᓐ ᑰᐦᑰᔑᔥ᙮

ᐯᔓᒡ ᐊᓂᑌ ᓂᐦᑖᐧᐃᒋᐦᒋᑲᓂᐦᒡ᙮ ᐊᔦᔅᑲᐧᐄᔭᓀ ᐧᐋᐸᐦᒉ ᐁ ᒉᒋᔐᐹᔮᒡ, ᒋᑲ ᐯᒋ ᑌᐧᐹᑎᑎᓐ ᒫᒪᐤ ᒉᒌ ᓇᑕᐧᐃ ᒫᒨᔥᒋᓇᒪᐦᒄ ᒉᒌ ᒦᒋᓱᔭᐦᒄ

ᐁᑯᑌ, ᒌ ᐃᐧᑌᐤ ᐊᓐ ᑰᐦᑰᔑᔥ, ᐧᐄᐸᒡ ᓂᑲ ᓂᓵᐧᐄᓐ᙮ ᑖᓂᔅᐱᔥ ᐧᐋ ᐃᑐᐦᑌᔭᓐ?

ᐊᔨᐦᐁ, ᓂᑯᐧᑖᔅ ᐃᔅᐸᔨᐦᒉ᙮ ᒌ ᐃᐧᑌᐤ ᒪᐦᐄᐦᑲᓐ᙮

ᐊᓂᐦᐁ ᒫᒃ ᑰᐦᑰᔑᔥ ᒌ ᐧᐊᓂᔥᑳᐤ ᓂᔮᔭᓐ ᐁ ᐃᔅᐱᔑᐸᔨᓂᔨᒡ ᐁᒄ ᒫᒃ ᑳ ᓈᑕᐦᒃ ᐊᓂᔨᐤᐦ ᐅᑎᓰᐦᑳᓐᐦ ᐧᐹᒧᔥ ᑳ ᑕᑯᔑᓂᔨᒡᐦ ᐊᓂᔨᐤᐦ ᒪᐦᐄᐦᑲᓐᐦ᙮ ᐁᑯ ᑳ ᐃᑎᑯᑦ,

ᑰᐦᑰᔑᔥ! ᐋᔥ ᐋ ᒋᑦ ᐃᔥᐧᑳ ᐊᔦᔅᑲᐧᐄᓐ?

ᐋᔥ! ᒌ ᐃᐧᑌᐤ ᑰᐦᑰᔑᔥ, ᐧᐄᐸᒡ ᓂᒌ ᐃᑐᐦᑌᓐ ᐊᓂᑌ᙮ ᓂᒌ ᐯᒋ ᒌᐧᐁᐦᑌᓐ ᑳ ᐃᔥᐧᑳ  ᓵᑲᔥᒋᓇᐦᐊᒃ ᓂᑦ ᐊᔅᒋᐦᒄ᙮

ᒌ ᒋᔑᐧᐋᐦᐃᑯᐧᐁᐤ ᒫᒃ ᒫᐦᐄᐦᑲᓐ ᐁ ᐯᐦᑕᐧᒫᑦ ᐊᓂᔨᐤ, ᒥᒄ ᒫᒃ ᒌ ᒉᔥᑎᓈᐦᐅᐤ ᒉᒌ ᐱᔑᐎᔮᑦ ᐊᓂᔨᐤᐦ ᑰᐦᑰᔑᔕ᙮ ᐁᒄ ᑳ ᐃᐧᑌᑦ,

ᑰᐦᑰᔑᔥ! ᓂ ᒋᔅᒉᔨᒫᐤ ᑖᓂᑕ ᐁᐦᑖᑦ ᐧᐋᐱᒥᓈᐦᑎᒄ ᐁ ᒥᐧᔮᔅᑯᓯᑦ᙮

ᑖᓂᑌ? ᐃᐧᑌᐤ ᐊᓐ ᑰᐦᑰᔑᔥ᙮

ᐯᔓᒡ ᐊᓂᑌ ᓂᐦᑖᐧᐃᒋᐦᒋᑲᓂᐦᒡ᙮ ᒌ ᐃᐧᑌᐤ ᒪᐦᐄᐦᑲᓐ, ᐁᑳ ᒫᒃ ᒋᐧᔮᐦᐃᔭᓀ, ᒋᑲ ᐯᒋ ᓇᑕᐧᐋᐸᒥᑎᓐ ᐧᐋᐸᐦᒉ, ᓂᔮᔭᓐ ᐃᔅᐱᔑᐸᔨᐦᒉ, ᒉᒌ ᒥᓈᐦᐅᔭᐦᒄ ᐧᐋᐱᒥᓇᒡ᙮

ᐊᓂᐦᐁ ᒫᒃ ᑰᐦᑰᔑᔥ ᒌ ᐹᐦᐹᔒᐤ ᒉ ᒋᐦᑐᐦᑌᑦ ᓀᐤ ᐁ ᐃᔅᐱᔑᐸᔨᓂᔨᒡ ᑳᐤ ᒉᒌ ᑕᑯᔑᐦᒃ ᐁᔥᒄ ᐁᑳ ᑕᑯᔑᓂᔨᒡᐦ ᒪᐦᐄᐦᑲᓐᐦ᙮ ᒌ ᓇᑕᐧᐁᔨᐦᑖᐧᑲᓂᔨᐤ ᒫᒃ ᐊᐧᐊᔥᑌᔒᔥ ᒉ ᐃᑐᐦᑌᑦ ᓀᔥᑦ ᒉ ᐊᑯᓰᑦ ᒥᔥᑎᑯᐦᒡ᙮

ᓀᐧᐃᔥ ᒫᒃ ᑳ ᐃᐦᑖᑦ ᐊᓂᑌ ᒥᔥᑎᑯᐦᒡ, ᒌ ᐃᑌᔨᐦᑕᒻ ᐋᔥ ᑳ ᐅᑎᐦᒋᐸᔨᓂᔨᒡ ᒉ ᒌᐧᐁᑦ᙮ ᑳ ᓃᔖᐦᑕᐧᐄᑦ ᒫᒃ ᐊᓂᔨᐤᐦ ᒥᔥᑎᐧᑲ, ᒌ ᓴᔅᒋᐧᑳᐸᒣᐤ ᐊᓂᔨᐤᐦ ᒪᐦᐄᐦᑲᓐᐦ ᐁ ᐹᐸᐦᑖᔨᒡᐦ᙮ ᒉᒫᓂᒻ ᒫᒃ ᒌ ᑯᔥᑖᒋᐤ ᐁ ᐧᐋᐸᒫᑦ᙮ ᒌ ᐃᑎᑯᐤ ᒫᒃ ᐊᓂᔨᐤᐦ ᒪᐦᐄᐦᑲᓐᐦ ᑳ ᑕᑯᔑᓂᔨᒡᐦ,

ᑰᐦᑰᔑᔥ! ᒉᐧᑳᓐ ᐧᐁᐦᒋ ᐁᑳ ᐅᐦᒋ ᐯᐦᐃᔭᓐ? ᒥᔪᒥᓇᒋᓯᐧᐊᒡ ᐋ ᐧᐋᐱᒥᓇᒡ?

ᐁᐦᐁ! ᒌ ᐃᐧᑌᐤ ᑰᐦᑰᔑᔥ, ᐯᔭᒄ ᒋᑲ ᓃᐦᒋᐧᐁᐱᓇᒫᑎᓐ᙮

ᐁᒄ ᐧᐋᐦᔭᐤ ᑳ ᐃᔑᐧᐁᐱᓇᒪᐧᐋᑦ ᐊᓂᔨᐤᐦ᙮ ᒣᐧᑳᒡ ᒫᒃ ᐊᓂᐦᐁ ᒪᐦᐄᐦᑲᓐ ᑳ ᓈᒋᐸᐦᐋᑦ ᐊᓂᔨᐤᐦ ᐧᐋᐸᒥᓐᐦ, ᒌ ᐋᒥ ᐧᑳᔥᑯᐦᑎᔨᐤᐦ ᑰᐦᑰᔑᔕ ᒉ ᒋᐧᐁᐸᐦᑖᔨᒡᐦ᙮ ᒦᓐ ᑳ ᒌᔑᑳᔨᒡ, ᒌ ᑕᑯᔑᓄ ᒪᐦᐄᐦᑲᓐ ᐁ ᐃᑖᑦ,

ᑰᐦᑯᔑᔥ! ᑲᑕ ᒪᑯᔖᓂᐧᐃᐤ ᐊᓂᑌ ᐅᑌᓈᐦᒡ ᐧᐋᐸᐦᒉ᙮ ᒋᐧᐄ ᐃᑐᐦᑌᓐ ᐋ?

ᐁᐦᐁ! ᒌ ᐃᐧᑌᐤ ᑰᐦᑰᔑᔥ, ᑖᓐ ᒉ ᐃᔅᐱᔑᐸᔨᐦᒡ ᒉ ᐃᔥᐧᑳ ᐊᔦᔅᑲᐧᐄᔭᓐ?

ᓂᔥᑐ ᐃᔅᐸᔨᐦᒉ! ᒌ ᐃᐧᑌᐤ ᐊᓐ ᒪᐦᐄᐦᑲᓐ᙮ ᒦᓐ ᒫᒃ ᐧᐄᐸᒡ ᑳ ᒋᐦᑐᐦᑌᑦ ᑰᐦᑰᔑᔥ ᐁ ᐧᐄ ᐃᑐᐦᑌᑦ ᐊᓂᑌ ᐁ ᒪᑯᔖᓂᐧᐃᔨᒡ᙮ ᐃᔥᑯᑕᒃ ᒫᒃ ᑳ ᒌᔑ ᒥᒋᓱᑦ, ᒌ ᒌᐧᐁᐦᑕᑖᐤ ᐃᔥᑯᐦᒋᑲᓐᐦ ᐊᓂᑌ ᐊᔅᒋᐦᑯᐦᒡ᙮ ᒦᓐ ᒫᒃ ᑳ ᓴᔅᒋᐧᑳᐸᒫᑦ ᐊᓂᔨᐤᐦ ᒪᐦᐄᐦᑲᓐᐦ ᐁ ᐹᐸᐦᑖᔨᒡᐦ᙮ ᑳ ᐧᑮᑕᐤ ᐊᔨᐦᑎᑦ ᒫᒃ, ᒌ ᐴᐦᒋ ᐧᑳᔥᑯᐦᑎᐤ ᐊᓂᑌ ᐊᔅᒋᐦᑯᐦᒡ ᒉᒌ ᑳᓱᑦ, ᒥᒄ ᒫᒃ ᒌ ᐅᐦᐱᒣᐸᔨᐤ᙮ ᓴᔅᒋᑯᒡ ᒫᒃ ᒌ ᐱᓇᐧᓭᐸᔨᐤ ᐊᓐ ᑰᐦᑰᔑᔥ ᒣᐧᑳᒡ ᑳ ᐴᐦᑕᐱᑦ ᐊᓂᑌ ᐊᔅᒋᐦᑯᐦᒡ! ᒌ ᒌᐧᐁᐸᐦᑖᐤ ᒫᒃ ᒪᐦᐄᐦᑲᓐ ᐁ ᐃᔅᐱᔑ ᑯᔥᑖᒋᐦᐃᑯᑦ ᑳ ᐧᐋᐸᒫᑦ ᐊᓂᔨᐤᐦ ᐊᔅᒋᐦᐧᑲ ᐁ ᐯᒋ ᐱᓇᐧᓭᐸᔨᔨᒡᐦ᙮ ᐁᒄ ᑳ ᐃᑐᐦᑌᐧᐋᑦ ᐅᐧᐋᔅᑳᐦᐃᑲᓂᒥᔩᐦᒡ ᐊᓂᔨᐤᐦ ᑰᐦᑰᔑᔕ ᒉ ᐧᐄᐦᑕᒪᐧᐋᑦ ᑖᓐ ᑳ ᐃᔅᐱᔑ ᑯᔥᑖᒋᑦ ᐁ ᒌ ᐧᐋᐸᒫᑦ ᐊᓂᔨᐤᐦ ᐊᔅᒋᐦᐧᑲ ᑳ ᐱᓇᐧᓭᐸᔨᔨᒡᐦ᙮ ᐁᒄ ᑳ ᐃᑎᑯᑦ ᐊᓂᔨᐤᐦ ᑰᐦᑰᔑᔕ,

ᐊᐦᐋ! ᒋᒌ ᓭᒋᐦᐃᑎᓐ, ᓇ! ᐋᔥ ᓂᒌ ᐃᑐᐦᑌᓐ ᐊᓂᑌ ᑳ ᒪᑯᔖᓂᐧᐃᒡ᙮ ᑳ ᒌᐧᐁᐦᑕᐦᐊᒃ ᒫᒃ ᐊᔅᒋᐦᒄ, ᒋᒌ ᐧᐋᐸᒥᑎᓐ᙮ ᐁᑯᑕ ᒫᒃ ᑳ ᐴᐦᒋ ᐧᑳᔥᑯᐦᑎᔮᓐ ᐊᓂᑌ ᐊᔅᒋᐦᑯᐦᒡ ᒉᒌ ᐱᓇᐧᓭᐸᔨᔮᓐ!

ᐁᑯ ᑳ ᓲᐦᒋᔭᐧᐁᓯᐧᐋᑦ ᒪᐦᐄᐦᑲᓐ ᐁ ᐯᐦᑕᐧᒫᑦ ᐊᓂᔨᐤᐦ᙮ ᐋᔨᑌ ᒫᒃ ᒌ ᐃᑎᑎᓱᐤ ᒉ ᓃᔖᐦᑕᐧᐄᐧᐋᑦ ᐊᓂᑌ ᐅᑯᐦᑖᑲᓂᒥᔩᐦᒡ ᒉ ᓇᑕᐧᐃ ᒧᐧᐋᑦ ᐊᓂᔨᐤᐦ ᑰᐦᑰᔑᔕ᙮ ᐃᔥᑯᑕᒃ ᑳ ᐧᐋᐸᒫᑦ ᑰᐦᑰᔑᔥ ᑖᓐ ᐁᔨᑎᔨᒡᐦ ᐊᓂᔨᐤᐦ ᒪᐦᐄᐦᑲᓐᐦ, ᒌ ᐊᑯᑌᐤ ᐊᔅᒋᐦᐧᑲ ᑳ ᓵᑲᔥᒋᓀᐯᔨᒡᐦ ᐊᓂᑌ ᐃᔥᑯᑌᐦᒡ, ᐁᒄ ᑳ ᑯᑕᐧᐁᑦ᙮ ᐧᒣᐦᒡ ᒫᒃ ᑳ ᐯᒋ ᓃᔖᐦᑕᐧᐄᔨᒡᐦ ᐊᓂᔨᐤᐦ ᒪᐦᐄᐦᑲᓐᐦ, ᐊᓐ ᑰᐦᑰᔑᔥ ᒌ ᐋᐸᐦᐧᐁᐤ ᐊᓂᔨᐤᐦ ᐊᔅᒋᐦᐧᑲ ᒉᒌ ᐴᐦᒋᐸᔨᔨᒡᐦ᙮ ᑳᐤ ᒫᒃ ᒌ ᐊᑯᓈᐧᐯᐦᐧᐁᐤ ᐊᓂᔨᐤᐦ ᐊᔅᒋᐦᐧᑲ ᒉᒌ ᐸᑳᔑᒫᑦ ᐊᓂᔨᐤᐦ ᒪᐦᐄᐦᑲᓐᐦ᙮ ᑳ ᓃᐯᐦᐧᑫᑦ ᒫᒃ, ᐁᐧᐊᐧᑲᓂᔨᐤᐦ ᑳ ᒧᐧᐋᑦ᙮ ᐁᒄ ᒫᒃ ᑳ ᒥᐧᔦᔨᐦᑕᐦᒃ ᐊᓂᐦᐁ ᑰᐦᑯᔑᔥ, ᑳᒋᒉ ᓀᔥᑦ ᑳᒋᒉ᙮

Three_little_pigs_-_the_wolf_lands_in_the_cooking_pot_-_Project_Gutenberg_eText_15661

The above is a Southern East Cree translation of The Three Little Pigs, a traditional English fairytale first published by James Orchard Halliwell-Phillipps around 1886. However, it was Joseph Jacobs’ version, first published in 1890, that would go on to become the most popular. His version, published in his English Fairy Tales, credits Halliwell-Phillips as the source and is the version translated here. This translation stays faithful to the original except for the episode of the fair where the pig heads home with a churn. To avoid an awkward translation, the fair and churn were translated instead as a feast and pot.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s