ᑕᐧᑳᒋᓐ᙮ ᓈᔥᒡ ᒫᒃ ᓂᒥᐧᔦᔨᐦᑕᒸᓐ ᐊᓄᐦᒌᔥ ᐁ ᐧᐄᒉᐧᐃᑦ ᓂᑖᓂᔅ ᐁ ᓈᓇᑕᐧᐃᐦᔦᐧᐁᐸᔨᔮᓐ᙮ ᓂᔮᓈᓀᐧᐃᐱᐳᐧᓀᓯᐤ ᓂᑖᓂᔅ, ᓂᓃᔥᑕᒨᔖᓐ ᑲᔭᐹ᙮ ᓂᑦᐊᔭᒥᐦᐃᑐᓈᓐ ᒣᐧᑳᒡ ᐁ ᐸᐹᒥᐸᔨᔮᐦᒡ, ᐁ ᒥᐧᔦᔨᐦᑕᒫᐦᒡ ᓀᔥᑦ ᐁ ᐧᐋᓭᔅᐧᑲᓂᔑᔮᐦᒡ᙮
ᓴᔅᒋᑯᒡ ᒉᐱᐦᑕᐧᐁᔮᓐ ᐁ ᐧᐋᐸᒪᐧᑳᐤ ᒥᔥᑎᑯᐦᔦᐧᐊᒡ ᐁ ᓈᓃᐸᐧᐃᐧᑖᐤ ᐊᓐᑌ ᐅᐦᐱᒣᔅᑲᓇᐤ᙮ ᐁᒄ ᒉᐱᐦᒋᐸᔨᐦᑖᔮᓐ ᓅᑖᐹᓐ ᐯᐦᑳᒡ ᒉᒌ ᑲᐹᔮᐦᒡ ᐁ ᐧᐄ ᑲᐧᑫ ᓂᐸᐦᐊᐧᑳᐤ᙮ ᐹᐦᒋᐱᐦᐧᑫᔮᓐ ᐅᑖᐹᓂᐦᒡ ᐁ ᐅᐦᐱᒣ ᓃᐸᔅᑯᔮᐦᒡ᙮ ᐁᒄ ᐧᐁᔮᔅᑯᓂᒉᔮᓐ ᐯᔭᒄ ᐱᔦᐤ ᐁ ᐧᐄ ᐹᔅᒋᓱᒃ᙮ ᒫᔅᑯᐦᐅᒃ! ᐧᐁᐦᐸᐦᐅᐧᑖᐤ ᒫᒃ ᐊᓂᒌ ᑯᑕᑲᒡ᙮ ᓂᓈᑖᔨᐤᐦ ᐊᓂᔨᐤᐦ ᐱᔦᐤᐦ ᑳ ᐹᔅᒋᐧᓵᒪᒃ ᒉ ᒦᔭᒃ ᓂᑖᓂᔅ ᒉᒌ ᑕᐦᑯᓈᑦ᙮
ᓴᔅᒋᑯᒡ ᒫᒃ ᓂᑌᐧᐹᑎᒄ ᓂᑖᓂᔅ ᐁ ᐃᐧᑌᑦ, ᓅᐦᑖ! ᐁᔥᒄ ᐃᔨᓃᐧᐃᐤ ᐆᐦᐁ ᐱᔦᐤ!
ᐊᓄᐦᒌᔥ ᒫᒃ ᐁ ᒫᒥᑐᓀᔨᐦᑕᒧᒃ ᐊᓂᔨᐤ, ᓂᐧᐊᐧᐃᔭᑌᔨᐦᑕᐧᒫᓐ᙮ ᒣᐧᑳᒡ ᒫᒃ ᑳ ᑌᑆᔑᑦ, ᒥᒄ ᓂᒌ ᒫᒥᑐᓀᔨᒫᐧᐊᒡ ᑯᑕᑲᒡ ᐱᔦᐧᐊᒡ ᑳ ᑯᑖᐧᐋᔅᑯᐦᔮᐧᑖᐤ᙮ ᓇᒪᐐᔾ ᓅᐦᒋ ᐃᔅᐱᔒᐙᓐ ᒉᒌ ᐱᓯᔅᑳᑕᒃ᙮
ᒫᒫᐦᒋᑯᓐ ᒥᒃ ᐁᑳ ᒉ ᐅᐦᒋ ᐅᐦᐸᐦᐅᑦ! ᓂᑦᐃᑖᐤ ᐁ ᑯᑖᐧᐋᔅᑯᐦᐊᒫᓐ ᒉᒌ ᓅᓱᓀᐦᐅᐧᑳᐤ ᐊᓂᒌ ᑯᑕᑲᒡ ᐱᔦᐧᐊᒡ᙮ ᐯᐦᑳᒌᐤ ᒫᒃ ᐁ ᐯᒋ ᓅᓱᓀᐦᐅᑦ ᓂᑖᓂᔅ᙮
ᒉᒃ ᐧᐃᔮᐸᒪᒃ ᐁ ᐊᑯᓰᑦ ᐯᔭᒄ ᒥᔥᑎᑯᐦᔦᐤ ᐊᓂᑌ ᓭᓭᑳᐦᑎᑯᐦᒡ᙮ ᐁᑳᐧᐄᔾ ᐋᐦᒌ! ᓂᑦᐃᑖᐤ ᓂᑖᓂᔅ ᐁ ᐧᐄ ᐹᔅᒋᐧᓵᒪᒃ᙮ ᐯᐦᒋᔑᐦᒃ ᐊᓂᐦᐁ ᐱᔦᐤ ᐁ ᐹᔅᒋᓱᒃ, ᓇᒪᐐᔾ ᒫᒃ ᓅᐦᒋ ᓂᐸᐦᐋᐤ᙮ ᐋᑕ ᒫᒃ ᐁ ᒥᔣᑲᓂᐦᑳᑕᒃ, ᒋᐦᒋᐸᐦᑖᐤ ᔮᐱᒡ᙮ ᓂᔮᒋᐸᐦᐊᒃ ᐊᓂᐦᐁ ᒥᔣᑲᓐ ᐁᒄ ᐹᒥᐧᑫᓇᒃ ᐁ ᑳᐦᒋᑎᓇᒃ᙮ ᐧᐁᑎᓈᑦ ᐊᓂᔨᐤᐦ ᐱᔦᐤᐦ ᓂᑖᓂᔅ ᐁ ᒥᔯᔨᐦᑕᐦᒃ ᓀᔥᑦ ᐋᔥ ᐁᑳ ᐊᔮᐦᒌᔨᒡᐦ ᓀᔨᐤᐦ ᐱᔦᐤᐦ ᓃᔥᑕᒻ ᑳ ᑕᐦᑯᓈᑦ᙮ ᓂᔮᓇᑕᐧᐋᐸᒪᒋᐦᐧᑖᐤ ᒫᒃ ᑯᑕᑲᒡ ᐱᔦᐧᐊᒡ ᐊᓂᑌ ᐁ ᐊᔭᐱᐧᑖᐤ᙮ ᐁᔥᐧᑳ ᐹᐦᐹᔅᒋᓱᐧᑳᐤ, ᓂᐧᐄᑕᐱᒥᑐᓈᓐ ᓂᑖᓂᔅ ᐊᓂᑌ ᒧᔥᑕᔅᑲᒥᒡ ᐁ ᐹᐦᐸᔥᑯᐱᒋᒉᔮᐦᒡ᙮ ᓴᔅᒋᑯᒡ ᔑᔮᐧᐹᔅᐧᑫᔮᔥᑕᐧᐁᑦ ᐲᓯᒽ᙮ ᓈᔥᑖᐺ ᒋᔮᒣᔨᐦᑖᐧᑲᓐ᙮
ᒨᔥ ᓂᑲ ᑲᓄ ᒋᔅᒋᓯᓐ ᑳ ᐃᔅᐱᔑ ᒥᐧᔮᔑᒡ ᓀ ᒌᔑᑳᐤ᙮ ᐊᓄᐦᒌᔥ ᒫᒃ, ᐁᔥᒄ ᓵᑲᔥᒋᓀᐤ ᓂᑌᐦᐄ ᓵᒋᐦᐃᐧᐁᐧᐃᓐ ᐅᐦᒋ ᐁ ᒫᒥᑐᓀᔨᐦᑕᒧᒃ ᑳ ᐧᐄᒋ ᓇᑕᐧᐃᐦᔦᐧᐁᒥᑦ ᓂᑖᓂᔅ ᐊᓂᔨᐤ ᑳ ᑕᐧᑳᒋᓂᔨᒡ᙮
Kepin's Cree Language Blog 