ᐌᔥᑲᒡ ᐊᓂᑌ ᒌᑳᔅᒄ ᐁ ᒋᑎᒫᒋᓰᑦ ᓅᑖᐦᑎᑴᓯᐤ ᒌ ᐐᒋᒣᐤ ᐐᒋᔅᑴᐤᐦ ᓀᔥᑦ ᐅᑦ ᐊᐙᔑᔒᒻᐦ ᐁ ᓃᔑᔨᑣᐤᐦ᙮ ᐯᔭᒀᐤ ᐁ ᑕᒀᒋᐦᒡ ᒌ ᓅᐦᑌᐦᑲᑖᓂᐎᐤ ᐊᓂᑌ ᐊᔅᒌᐦᒡ᙮ ᐊᓂᐦᐁ ᒫᒃ ᓈᐯᐤ ᓇᒪᐐᔾ ᐅᐦᒋ ᒌ ᐊᔕᒣᐤ ᐅᑑᑌᒻᐦ᙮ ᐊᓂᔨᐤᐦ ᐐᒋᔅᑴᐤᐦ ᒌ ᐊᔮᒀᒥᒥᑯᐤ ᒉ ᑲᐗᐦᑲᑌᔨᑣᐤᐦ ᐅᑦ ᐊᐙᔑᔒᒥᐙᐤᐦ᙮ ᐯᔭᒀᐤ ᒫᒃ ᐁ ᑎᐱᔅᑳᔨᒡ ᒌ ᐃᑎᑯᐤ ᐐᒋᔅᑴᐤᐦ ᒉ ᐃᔑᐎᔮᑦ ᐊᓂᔨᐤᐦ ᐊᐙᔑᔕ ᐊᓂᑌ ᓅᐦᒋᒦᐦᒡ ᒉᒋ ᓇᑲᑖᑲᓂᐎᔨᑣᐤᐦ᙮
ᐅᑯᓯᓯᒫᐤ ᒫᒃ ᐁ ᒌ ᒉᔥᑎᓇᐎᐦᑕᐦᒃ ᐊᓂᔨᐤ ᐁ ᐃᑣᓂᐎᔨᒡ ᑳ ᐐᐦᑕᒪᐙᑦ ᐅᒥᓴ᙮ ᐋᑕ ᒫᒃ ᑳ ᑯᔥᑖᒋᑣᐤ ᑖᐱᔥᑰᒡ ᑳ ᐐᒋᔖᓂᑐᑣᐤ, ᔮᐱᒡ ᒌ ᐊᔦᔅᑲᐐᐗᒡ᙮ ᑳ ᐋᐱᐦᑖ ᑎᐱᔅᑳᔨᒡ ᐁ ᐃᔥᐸᑯᒋᓂᔨᒡᐦ ᑎᐱᔅᒋ ᐲᓯᒶ, ᒋᔮᒻ ᒌ ᓂᐦᒋᓈᑰᐤ ᐊᓂᐦᐁ ᓈᐯᔑᔥ ᒉᒋ ᐗᔭᐐᑦ ᐁ ᐐ ᓇᑕᐎ ᒫᒨᔥᒋᓈᑦ ᐊᓯᓂᔾᐦ ᑳ ᐙᐹᐱᔅᒋᓯᔨᑣᐤᐦ᙮ ᒌ ᓵᑲᔥᒋᓇᐦᑖᐤ ᒫᒃ ᐅᑆᑭᑎᒻ᙮
ᑳ ᒉᒋᔐᐹᔮᔨᒡ, ᐊᓂᒌ ᐊᐙᔑᔕᒡ ᒌ ᒋᐦᒋᐎᔨᑯᐗᒡ ᐅᐦᑖᐐᐙᐤᐦ ᐁ ᐐ ᓈᒋᐦᑕᑴᔨᒡᐦ᙮ ᒣᒀᒡ ᒫᒃ ᐁ ᐱᒧᐦᑌᑦ ᐊᓂᐦᐁ ᓈᐯᔑᔥ, ᒌᒨᒡ ᒌ ᐹᐦᐸᒋᑎᓀᐤ ᐊᓯᓂᔾᐦ ᒉᒌ ᒋᔅᒋᓇᐙᒋᐦᑖᑦ ᐅᒣᔅᑲᓇᐤ᙮
ᐙᐦᔭᐤ ᐊᓂᑌ ᐁ ᒥᔥᑎᑯᔅᑳᔨᒡ, ᒌ ᑯᑕᐗᑌᐤ ᐊᓂᐦᐁ ᐅᐦᑖᐐᒫᐤ ᐅᑦ ᐊᐙᔑᔒᒻᐦ ᐁᒄ ᑳ ᑲᐎᔑᒧᓇᐦᐋᑦ᙮ ᒣᒀᒡ ᒫᒃ ᐁ ᓂᐹᔨᑣᐤᐦ, ᒌ ᓇᑲᑌᐤ ᐊᓂᔨᐤᐦ ᐊᐙᔑᔕ᙮ ᐋᔭᐦᑯᓈᐤᐦ ᒥᒄ ᒌ ᓇᑲᑕᒪᐌᐤ ᒉᒌ ᒦᒋᓱᔨᑣᐤᐦ᙮ ᐋᔥ ᒫᒃ ᑳ ᒌ ᐊᔦᔅᑲᐐᑣᐤ ᐊᓂᒌ ᐊᐙᔑᔕᒡ, ᐌᔭᐱᔥᒌᔥ ᒥᒄ ᒌ ᓂᐹᔑᐗᒡ᙮ ᐁᒄ ᑳ ᒌᔑᑳᔥᑌᔨᒡ, ᒌ ᓅᓱᓀᐦᐌᐗᒡ ᐊᓂᔨᐤᐦ ᐊᓯᓂᔾᐦ ᑳ ᐙᓯᐦᒀᐱᔅᒋᓯᔨᑣᐤᐦ ᒉᒌ ᒥᑎᒣᑣᐤ᙮ ᒉᒃ ᑳ ᑕᑯᔑᐦᒀᐤ ᐊᓂᑌ ᐐᒋᐙᐦᒡ᙮ ᐃᔥᑯᑕᒃ ᑳ ᐙᐸᒫᑦ ᐊᓂᐦᐁ ᐃᔅᑴᐤ ᐊᓂᔨᐤᐦ ᐊᐙᔑᔕ ᐁ ᑕᑯᔑᓂᔨᑣᐤᐦ ᒌ ᒥᔯᔨᐦᑕᒨᐦᑳᓱᐤ, ᒥᒄ ᒫᒃ ᑖᐺ ᒌ ᒋᔑᐌᔨᒣᐤ ᑳᐤ ᐁ ᒌ ᑕᑯᔑᓂᔨᑣᐤᐦ᙮
ᒦᓐ ᑳ ᐙᐸᓂᔨᒡ ᒌ ᐃᑕᔕᐙᑌᐤ ᐅᓈᐯᒻᐦ ᒦᓐ ᒉ ᐃᑐᐦᑕᐦᐋᔨᒡᐦ ᐅᑦ ᐊᐙᔑᔒᒥᐙᐤᐦ ᐊᓂᑌ ᓅᐦᒋᒦᐦᒡ᙮ ᐊᐗᓯᑌ ᐙᐦᔭᐤ ᒌ ᐃᑐᐦᑕᐦᐁᐤ ᐅᑦ ᐊᐙᔑᔒᒻᐦ ᐊᓐ ᓈᐯᐤ᙮ ᐁᑳ ᒫᒃ ᑳ ᐊᔮᐙᑦ ᐊᓯᓂᔾᐦ ᐊᓐ ᓈᐯᔑᔥ, ᒌ ᐱᒋᔥᒋᐱᑌᐤ ᐅᑦ ᐋᔭᐦᑯᓈᒻᐦ ᒉᒌ ᒋᔅᒋᓇᐙᒋᐦᑖᑦ ᐅᒣᔅᑲᓇᐤ᙮ ᒥᒄ ᒫᒃ ᐱᔦᔒᔕ ᒌ ᒧᐌᔨᐤᐦ ᐊᓂᔨᐤᐦ ᐋᔭᐦᑯᓈᐤᐦ ᑳ ᐹᐦᐸᒋᑎᓈᑦ᙮ ᓇᒪᐐᔾ ᒫᒃ ᐅᐦᒋ ᒌ ᒥᔅᑲᒻ ᐊᓂᔨᐤ ᒣᔅᑲᓈᔨᐤ ᐊᓐ ᓈᐯᔑᔥ ᒉᒌ ᒌᐌᑣᐤ᙮
ᑳ ᐙᐸᓂᔨᒡ ᒫᒃ ᐊᓐ ᐃᔥᑴᔑᔥ ᒌ ᐱᓯᔅᑳᐸᒣᐤ ᐱᔦᔒᔥ ᐁ ᐙᐱᓯᔨᒡᐦ᙮ ᒌ ᓄᓱᓀᐦᐌᐗᒡ ᐊᓂᒌ ᐊᐙᔑᔕᒡ ᐊᓂᔨᐤᐦ ᐱᔦᔒᔕ ᐁ ᐃᔅᐱᔑ ᒥᔪᐦᑕᐙᑣᐤ᙮ ᐁ ᐸᐹᒧᐦᑌᑣᐤ ᒫᒃ ᒌ ᒥᔅᑲᒧᒡ ᐙᔅᑳᐦᐃᑲᓂᔨᐤ ᐁ ᒫᒪᔅᑳᓯᓈᑾᓂᔨᒡ᙮ ᒬᐦᒡ ᐋᔭᐦᑯᓈᐦᒡ ᒌ ᐃᔑᓈᑾᓂᔨᐤ ᐊᓂᔨᐤ ᐙᔅᑳᐦᐃᑲᓂᔨᐤ ᑳ ᒥᔅᑲᐦᒀᐤ᙮ ᐊᐸᐦᒀᓂᔨᐤ ᒫᒃ ᒬᐦᒡ ᓰᐎᑏᓯᐦᒡ ᒌ ᐃᔑᓈᑾᓂᔨᐤ᙮ ᐊᓂᒌ ᒫᒃ ᐊᐙᔑᔕᒡ ᒌ ᐸᐦᑴᐦᑕᒧᒡ ᐊᓂᔨᐤ ᐙᔅᑳᐦᐃᑲᓂᔨᐤ ᐁ ᐃᔅᐱᔑ ᔒᐗᑌᑣᐤ᙮ ᐃᔥᑯᑕᒃ ᒫᒃ ᑳ ᓴᔅᑲᒧᑣᐤ, ᒌ ᐯᐦᑕᐌᐗᒡ ᐊᐌᔨᐤᐦ ᐁ ᐃᑎᑯᑣᐤ,
ᐋᐱᐦᑯᔒᔑᐦᒡ ᐃᑎᐦᑖᑯᓯᐤ!
ᐊᐌᓐ ᒫᒋᑦ ᓂ ᐙᔅᑳᐦᐃᑲᓂᒥᔨᐤ?
ᓴᔅᒋᑯᒡ ᑳ ᐋᐸᐦᐃᐸᔨᑦ ᐃᔥᒀᐦᑌᒻ, ᐁᒄ ᑳ ᓅᑯᓯᑦ ᐁ ᐗᔭᐐᑳᐸᐎᑦ ᒋᔐᐃᔥᑴᔥ ᐁ ᒪᒋᓈᑯᓯᑦ᙮ ᒌ ᐹᐦᐱᐦᑴᔩᔥᑕᐌᐤ ᐊᓂᐦᐁ ᒋᔐᐃᔥᑴᔥ ᐊᓂᔨᐤᐦ ᐊᐙᔑᔕ ᐁᒄ ᑳ ᐲᐦᑐᑲᐦᐋᑦ᙮ ᑳ ᐙᐸᒫᑦ ᐁ ᐃᔅᐱᔑ ᔑᐗᑌᔨᑣᐤᐦ, ᒌ ᐊᔕᒣᐤ ᐴᑎᓐᐦ ᓀᔥᑦ ᒦᓂᔕ ᐁᒄ ᑳ ᑲᐎᔑᒧᓇᐦᐋᑦ᙮
ᐊᓂᒌ ᑳ ᐐᒋᔖᓂᑐᑣᐤ ᓇᒪᐐᔾ ᐅᐦᒋ ᒋᔅᒉᔨᒣᐗᒡ ᐊᓂᔨᐤᐦ ᐃᔅᑴᐤᐦ ᑳ ᒥᔪ ᑑᑖᑯᑣᐤ ᒋᐦᒋᐌ ᑳ ᐋᐎᔨᒡᐦ ᐐᐦᑎᑰᔅᑴᐤᐦ! ᒣᒀᒡ ᒫᒃ ᑳ ᒥᔪᐦᒀᒥᑦ ᐊᓐ ᓈᐯᔑᔥ, ᒌ ᒋᐦᒋᐎᔨᑯᐤ ᐊᓂᔨᐤᐦ ᐐᐦᑎᑰᔅᑴᐤᐦ ᒉᒌ ᓇᑕᐎ ᒋᐸᐦᐅᑯᑦ ᐊᓂᑌ ᒋᐸᐦᐅᑑᐎᑲᒥᑯᐦᒡ᙮
ᐁᑯᑌ! ᒌ ᐃᑎᑎᓱᐤ ᐊᓂᐦᐁ ᒪᒋ ᐃᔅᑴᐤ, ᓂᑲ ᑖᐦᒋᐳᐦᐋᐤ ᒉᒌ ᒧᐗᒃ!
ᐊᓂᐦᐁ ᐐᐦᑎᑰᔅᑴᐤ ᒌ ᐃᑕᔕᐙᑌᐤ ᐊᓂᔨᐤᐦ ᐃᔥᑴᔑᔕ ᒉ ᐱᒥᓇᐌᔨᒡᐦ ᒉᒌ ᑖᐦᒋᐳᐦᐋᒪᒃ ᐊᓂᔨᐤᐦ ᐐᒋᔖᓂᔨᐤᐦ᙮ ᐊᓂᒌ ᒫᒃ ᐊᐙᔑᔕᒡ ᒌ ᓇᑐᑕᒪᐌᐗᒡ ᒉ ᐸᒋᑎᓂᑯᑣᐤ, ᐱᔑᔑᒄ ᒫᒃ ᒌ ᐅᔑᓈᑯᐗᒡ ᐊᓂᔨᐤᐦ ᐐᐦᑎᑰᔅᑴᐤᐦ᙮
ᐁᑳ ᒫᒃ ᑳ ᓇᐦᐋᐱᑦ ᐊᓂᐦᐁ ᒋᔐᐃᔥᑴᔥ ᒣᔕᑯᒻ ᒌᔑᑳᐤ ᒌ ᑲᑴᑎᓇᒬᐤ ᐅᑎᐦᒌᔨᐤ ᐊᓂᔨᐤᐦ ᓈᐯᔑᔕ ᐁ ᓇᑕᐙᐦᐋᑦ ᑌᐱ ᑖᐦᒋᐳᔨᑴᓐᐦ᙮ ᐯᔭᑾᐤ, ᒌ ᒥᔅᑲᒻ ᐅᔥᑲᓂᔥᒌᔑᔨᐤ ᐊᓂᐦᐁ ᓈᐯᔑᔥ ᐊᓂᑌ ᒋᐸᐦᐅᑑᐎᑲᒥᑯᐦᒡ᙮ ᑳ ᐯᒋ ᓇᑕᐙᐦᐃᑯᑦ ᒫᒃ ᐊᓂᔨᐤᐦ ᐐᐦᑎᑰᔅᑴᐤᐦ, ᐁᐗᑾᓂᔨᐤ ᑳ ᓃᒥᓇᒪᐙᑦ᙮ ᑳ ᑲᑴᑎᓇᐦᒃ ᒫᒃ ᐊᓂᔨᐤ ᐅᔅᑲᓂᔨᐤ ᐊᓂᐦᐁ ᒋᔐᐃᔥᑴᔑᔥ, ᒌ ᐃᑌᔨᒣᐤ ᐁᔥᒄ ᐁ ᐅᓵᒥ ᐸᔅᒉᐌᔨᒡᐦ ᐊᓂᔨᐤᐦ ᓈᐯᔑᔕ᙮ ᐁᒄ ᑳ ᐃᑎᑎᓱᑦ, ᐋᑕ ᑳ ᐊᔕᒫᑲᓂᐎᑦ ᐊᓂᐦᐁ ᓈᐯᔑᔥ, ᓇᒪᐐᔾ ᐐ ᑖᐦᒋᐳᐤ! ᑖᐺ ᒌ ᐴᒣᐦᐁᐤ ᐊᓂᐦᐁ ᐐᐦᑎᑰᔅᑴᐤ᙮
ᑳ ᒉᒋᔐᐹᔮᔨᒡ ᒌ ᐃᑕᔕᐙᑌᐤ ᐊᓂᔨᐤᐦ ᐃᔥᑴᔑᔕ ᒉ ᐲᐦᑎᑌᔮᐦᑕᐐᔨᒡᐦ ᐊᓂᑌ ᒋᔖᐱᔅᒋᓵᐙᓂᐦᒡ ᒉᒌ ᓇᑕᐙᐦᑖᔨᒡᐦ ᑌᐱᐦᑯᔦᔨᑴ ᐃᔥᑯᑌᔨᐤ᙮ ᐃᔥᑴᔑᔥ ᒫᒃ ᒌ ᑲᑴᒋᒣᐤ, ᑖᓐ ᐹᐦᑎᑌᔮᐦᑕᐐᔮᓐ ᐊᓂᑌ ᒋᔖᐱᔅᒋᓵᐙᓂᐦᒡ?
ᑳ ᒋᔑᐙᐦᐃᑯᑦ ᒫᒃ ᐊᓂᐦᐁ ᐐᐦᑎᑰᔅᑴᐤ, ᒌ ᐃᔅᒀᐦᑕᐐᐤ ᒉᒌ ᐙᐸᐦᑎᔮᑦ ᑖᓂᑌ ᒉ ᐃᔑ ᓇᑕᐙᐦᑖᔨᒡᐦ ᐃᔥᑯᑌᔨᐤ᙮ ᓴᔅᒋᑯᒡ ᒫᒃ ᐊᓂᐦᐁ ᐃᔥᑴᔑᔥ ᒌ ᑯᐦᑯᐌᐱᓀᐤ ᐊᓂᔨᐤᐦ ᒪᒋ ᐃᔅᑴᐤᐦ ᒉᒌ ᐴᐦᒋᐸᔨᔨᒡᐦ ᐊᓂᑌ ᒋᔖᐱᔅᒋᓵᐙᓂᐦᒡ᙮
ᐊᓂᒌ ᒫᒃ ᐊᐙᔑᔕᒡ ᒌ ᓵᑲᔥᒋᓇᐦᑖᐗᒡ ᐅᑆᑭᑎᒥᐙᐤᐦ ᑳ ᐅᐦᒋ ᒫᒨᔥᒋᓇᒸᑣᐤ ᐅᒦᔕᒋᓰᐎᓂᔨᐤ ᐊᓂᔨᐤᐦ ᐐᐦᑎᑰᔅᑴᐤᐦ ᐁᒄ ᑳ ᒌᐌᑣᐤ᙮ ᐯᔓᒡ ᒫᒃ ᒌ ᒪᑖᐯᐗᒡ ᐊᓂᑌ ᐁ ᐊᔭᑲᔥᑳᑲᒫᔨᒡ᙮ ᐊᓂᑌ ᒫᒃ ᓈᓯᐯᑎᒥᐦᒡ ᒌ ᐃᐦᑖᔨᐤᐦ ᐙᐱᓯᐤᐦ ᑳ ᒥᔑᒋᑎᔨᒡᐦ ᑳ ᓇᔅᑯᒧᔨᒡᐦ ᒉ ᐋᔕᐗᐦᐅᔨᑯᑣᐤ᙮ ᒉᒃ ᒌ ᒫᑖᒣᐗᒡ ᑳ ᓃᔑᑣᐤ ᐊᓂᔨᐤᐦ ᒣᔅᑲᓈᔨᐤ ᑳ ᒋᔅᒉᔨᐦᑕᐦᒀᐤ᙮
ᒌ ᐅᐦᒋᑲᐙᐱᐤ ᐊᓂᐦᐁ ᓅᑖᐦᑎᑴᓯᐤ ᐁ ᐃᔅᐱᔑ ᒥᔯᔨᐦᑕᐦᒃ ᑳᐤ ᐁ ᐅᐦᒋ ᐙᐸᒫᑦ ᐅᑦ ᐊᐙᔑᔒᒻᐦ᙮ ᓇᒪᐐᔾ ᒫᒃ ᐅᐦᒋ ᐃᐦᑖᔨᐤᐦ ᐊᓂᔨᐤᐦ ᐐᒋᔅᑴᐤᐦ ᐁ ᒌ ᐌᐱᓈᑦ ᐃᔥᑯᑕᒃ ᑳ ᒋᔅᒉᔨᒫᑦ ᐁ ᐃᔅᐱᔑ ᒪᒋᐦᑣᔨᒡᐦ᙮ ᑳ ᓂᔥᑎᑣᐤ ᒫᒃ ᒌ ᒥᔯᔨᐦᑕᒧᒡ ᐁ ᐃᔅᐱᔑ ᐱᒫᑎᓰᑣᐤ ᐁ ᐅᐦᒋ ᐱᒫᒋᐦᐅᐙᒉᐙᑣᐤ ᐊᓂᔨᐤ ᐅᒦᔕᒋᓰᐎᓂᔨᐤ ᐊᓂᔨᐤᐦ ᐐᐦᑎᑰᔅᑴᐤᐦ᙮
The above is a Southern East Cree translation of Hansel & Gretel, a fairytale of German origin that was recorded by the Brothers Grimm and first published in 1812.
Kepin's Cree Language Blog 