ᑳ ᐐᒋᔖᓂᑐᑣ

Hänsel_und_Gretel

ᐌᔥᑲᒡ ᐊᓂᑌ ᒌᑳᔅᒄ ᐁ ᒋᑎᒫᒋᓰᑦ ᓅᑖᐦᑎᑴᓯᐤ ᒌ ᐐᒋᒣᐤ ᐐᒋᔅᑴᐤᐦ ᓀᔥᑦ ᐅᑦᐊᐙᔑᔒᒻᐦ ᐁ ᓃᔑᔨᑣᐤᐦ᙮ ᐯᔭᒀᐤ ᐁ ᑕᒀᒋᐦᒡ ᒌ ᓅᐦᑌᐦᑲᑖᓂᐎᐤ ᐊᓂᑌ ᐊᔅᒌᐦᒡ᙮ ᐊᓂᐦᐁ ᒫᒃ ᓈᐯᐤ ᓇᒪᐐᔾ ᐅᐦᒋ ᒌ ᐊᔕᒣᐤ ᐅᑑᑌᒻᐦ᙮ ᐊᓂᔨᐤᐦ ᐐᒋᔅᑴᐤᐦ ᒌ ᐊᔮᒀᒥᒥᑯᐤ ᒉ ᑲᐗᐦᑲᑌᔨᑣᐤᐦ ᐅᑦᐊᐙᔑᔒᒥᐙᐤᐦ᙮ ᐯᔭᒀᐤ ᒫᒃ ᐁ ᑎᐱᔅᑳᔨᒡ ᒌ ᐃᑎᑯᐤ ᐐᒋᔅᑴᐤᐦ ᒉ ᐃᔑᐎᔮᑦ ᐊᓂᔨᐤᐦ ᐊᐙᔑᔕ ᐊᓂᑌ ᓅᐦᒋᒦᐦᒡ ᒉᒋ ᓇᑲᑖᑲᓂᐎᔨᑣᐤᐦ᙮

ᐅᑯᓯᓯᒫᐤ ᒫᒃ ᐁ ᒌ ᒉᔥᑎᓇᐎᐦᑕᐦᒃ ᐊᓂᔨᐤ ᐁ ᐃᑣᓂᐎᔨᒡ ᑳ ᐐᐦᑕᒪᐙᑦ ᐅᒥᓴ᙮ ᐋᑕ ᒫᒃ ᑳ ᑯᔥᑖᒋᑣᐤ ᑖᐱᔥᑰᒡ ᑳ ᐐᒋᔖᓂᑐᑣᐤ, ᔮᐱᒡ ᒌ ᐊᔦᔅᑲᐐᐗᒡ᙮ ᑳ ᐊᐱᐦᑖ ᑎᐱᔅᑳᔨᒡ ᐁ ᐃᔥᐸᑯᒋᓂᔨᒡᐦ ᑎᐱᔅᒋ ᐲᓯᒶ, ᒋᔮᒻ ᒌ ᓂᐦᒋᓈᑰᐤ ᐊᓂᐦᐁ ᓈᐯᔑᔥ ᒉᒋ ᐗᔭᐐᑦ ᐁ ᐐ ᓇᑕᐎ ᒫᒨᔥᒋᓈᑦ ᐊᓯᓃᐦ ᑳ ᐙᐹᐱᔅᒋᓯᔨᑣᐤᐦ᙮ ᒌ ᓵᑲᔥᒋᓇᑖᐤ ᒫᒃ ᐅᑆᑭᑎᒻ᙮

ᑳ ᒉᒋᔐᐹᔮᔨᒡ, ᐊᓂᒌ ᐊᐙᔑᔕᒡ ᒌ ᒋᐦᒋᐎᔨᑯᐗᒡ ᐅᐦᑖᐐᐙᐤ ᐁ ᐐ ᓈᒋᐦᑕᑴᔨᒡᐦ᙮ ᒣᒀᒡ ᒫᒃ ᐁ ᐱᒧᐦᑌᑦ ᐊᓂᐦᐁ ᓈᐯᔑᔥ, ᒌᒨᒡ ᒌ ᐹᐦᐸᒋᑎᓀᐤ ᐊᓯᓃᐦ ᒉᒌ ᒋᔅᒋᓇᐙᒋᐦᑖᑦ ᐅᒣᔅᑲᓇᐤ᙮

ᐙᐦᔭᐤ ᐊᓂᑌ ᐁ ᒥᔥᑎᑯᔅᑳᔨᒡ, ᒌ ᑯᑕᐗᑌᐤ ᐊᓂᐦᐁ ᐅᐦᑖᐐᒫᐤ ᐅᑦᐊᐙᔑᔒᒻᐦ ᐁᒄ ᑳ ᑲᐎᔑᒧᓇᐦᐋᑦ᙮ ᒣᒀᒡ ᒫᒃ ᐁ ᓂᐹᔨᑣᐤᐦ, ᒌ ᓇᑲᑌᐤ ᐊᓂᔨᐤᐦ ᐊᐙᔑᔕ᙮ ᐋᔭᐦᑯᓈᐤᐦ ᒥᒄ ᒌ ᓇᑲᑕᒪᐌᐤ ᒉᒌ ᒦᒋᓱᔨᑣᐤᐦ᙮ ᐋᔥ ᒫᒃ ᑳ ᒌ ᐊᔦᔅᑲᐐᑣᐤ ᐊᓂᒌ ᐊᐙᔑᔕᒡ, ᐌᔭᐱᔥᒌᔥ ᒥᒄ ᒌ ᓂᐹᔑᐗᒡ᙮ ᐁᒄ ᑳ ᒌᔑᑳᔥᑌᔨᒡ, ᒌ ᓅᓱᓀᐦᐌᐗᒡ ᐊᓂᔨᐤᐦ ᐊᓯᓃᐦ ᑳ ᐙᓯᐦᒀᐱᔅᒋᓯᔨᑣᐤᐦ ᒉᒌ ᒥᑎᒣᑣᐤ᙮ ᒉᒃ ᑳ ᑕᑯᔑᐦᒀᐤ ᐊᓂᑌ ᐐᒋᐙᐦᒡ᙮ ᐃᔥᑯᑕᒃ ᑳ ᐙᐸᒫᑦ ᐊᓂᐦᐁ ᐃᔅᑴᐤ ᐊᓂᔨᐤᐦ ᐊᐙᔑᔕ ᐁ ᑕᑯᔑᓂᔨᑣᐤᐦ ᒌ ᒥᔯᔨᐦᑕᒨᐦᑳᓱᐤ, ᒥᒄ ᒫᒃ ᑖᐺ ᒌ ᒋᔑᐌᔨᒣᐤ ᑳᐤ ᐁ ᒌ ᑕᑯᔑᓂᔨᑣᐤᐦ᙮

ᒦᓐ ᑳ ᐙᐸᓂᔨᒡ ᒌ ᐃᑕᔕᐙᑌᐤ ᐅᓈᐯᒻᐦ ᒦᓐ ᒉ ᐃᑐᐦᑕᐦᐋᔨᒡᐦ ᐅᑦᐊᐙᔑᔒᒥᐙᐤᐦ ᐊᓂᑌ ᓅᐦᒋᒦᐦᒡ᙮ ᐊᐗᓯᑌ ᐙᐦᔭᐤ ᒌ ᐃᑐᐦᑕᐦᐁᐤ ᐅᑦᐊᐙᔑᔒᒻᐦ ᐊᓐ ᓈᐯᐤ᙮ ᐁᑳ ᒫᒃ ᑳ ᐊᔮᐙᑦ ᐊᓯᓃᐦ ᐊᓐ ᓈᐯᔑᔥ, ᒌ ᐱᒋᔥᒋᐱᑌᐤ ᐅᑦᐋᔭᐦᑯᓈᒻᐦ ᒉᒌ ᒋᔅᒋᓇᐙᒋᐦᑖᑦ ᐅᒣᔅᑲᓇᐤ᙮ ᒥᒄ ᒫᒃ ᐱᔦᔒᔕ ᒌ ᒧᐌᔨᐤᐦ ᐊᓂᔨᐤᐦ ᐋᔭᐦᑯᓈᐤᐦ ᑳ ᐹᐦᐸᒋᑎᓈᑦ᙮ ᓇᒪᐐᔾ ᒫᒃ ᐅᐦᒋ ᒌ ᒥᔅᑲᒻ ᐊᓂᔨᐤ ᒣᔅᑲᓈᔨᐤ ᐊᓐ ᓈᐯᔑᔥ ᒉᒌ ᒌᐌᑣᐤ᙮

ᑳ ᐙᐸᓂᔨᒡ ᒫᒃ ᐊᓐ ᐃᔥᑴᔑᔥ ᒌ ᐱᓯᔅᑳᐸᒣᐤ ᐱᔦᔒᔥ ᐁ ᐙᐱᓯᔨᒡᐦ᙮ ᒌ ᓄᓱᓀᐦᐌᐗᒡ ᐊᓂᒌ ᐊᐙᔑᔕᒡ ᐊᓂᔨᐤᐦ ᐱᔦᔒᔕ ᐁ ᐃᔅᐱᔑ ᒥᔪᐦᑕᐙᑣᐤ᙮ ᐁ ᐸᐹᒧᐦᑌᑣᐤ ᒫᒃ ᒌ ᒥᔅᑾᒧᒡ ᐙᔅᑳᐦᐃᑲᓂᔨᐤ ᐁ ᒫᒪᔅᑳᓯᓈᑾᓂᔨᒡ᙮ ᒬᐦᒡ ᐋᔭᐦᑯᓈᐦᒡ ᒌ ᐃᔑᓈᑾᓂᔨᐤ ᐊᓂᔨᐤ ᐙᔅᑳᐦᐃᑲᓂᔨᐤ ᑳ ᒥᔅᑲᐦᒀᐤ᙮ ᐊᐸᐦᒀᓂᔨᐤ ᒫᒃ ᒬᐦᒡ ᓰᐎᑏᓯᐦᒡ ᒌ ᐃᔑᓈᑾᓂᔨᐤ᙮ ᐊᓂᒌ ᒫᒃ ᐊᐙᔑᔕᒡ ᒌ ᐸᐦᑴᐦᑕᒧᒡ ᐊᓂᔨᐤ ᐙᔅᑳᐦᐃᑲᓂᔨᐤ ᐁ ᐃᔅᐱᔑ ᔒᐗᑌᑣᐤ᙮ ᐃᔥᑯᑕᒃ ᒫᒃ ᑳ ᓴᔅᑲᒧᑣᐤ, ᒌ ᐯᐦᑕᐌᐗᒡ ᐊᐌᔨᐤᐦ ᐁ ᐃᑎᑯᑣᐤ,

ᐋᐱᐦᑯᔒᔑᐦᒡ ᐃᑎᐦᑖᑯᓯᐤ!

ᐊᐌᓐ ᒫᒋᑦ ᓂᐙᔅᑳᐦᐃᑲᓂᒥᔨᐤ?

ᓴᔅᒋᑯᒡ ᑳ ᐋᐸᐦᐃᐸᔨᑦ ᐃᔥᒀᐦᑌᒻ, ᐁᒄ ᑳ ᓅᑯᓯᑦ ᐁ ᐗᔭᐐᑳᐸᐎᑦ ᒋᔐᐃᔥᑴᔑᔥ ᐁ ᒪᒋᓈᑯᓯᑦ᙮ ᒌ ᐹᐦᐱᐦᑴᔩᔥᑕᐌᐤ ᐊᓂᐦᐁ ᒋᔐᐃᔥᑴᔑᔥ ᐊᓂᔨᐤᐦ ᐊᐙᔑᔕ ᐁᒄ ᑳ ᐲᐦᑐᑲᐦᐋᑦ᙮ ᑳ ᐙᐸᒫᑦ ᐁ ᐃᔅᐱᔑ ᔑᐗᑌᔨᑣᐤᐦ, ᒌ ᐊᔕᒣᐤ ᐴᑎᓐᐦ ᓀᔥᑦ ᒦᓂᔕ ᐁᒄ ᑳ ᑲᐎᔑᒧᓇᐦᐋᑦ᙮

ᐊᓂᒌ ᑳ ᐐᒋᔖᓂᑐᑣᐤ ᓇᒪᐐᔾ ᐅᐦᒋ ᒋᔅᒉᔨᒣᐗᒡ ᐊᓂᔨᐤᐦ ᐃᔅᑴᐤᐦ ᑳ ᒥᔪ ᑑᑖᑯᑣᐤ ᒋᐦᒋᐌᐤ ᑳ ᐋᐎᔨᒡᐦ ᐐᐦᑎᑰᔅᑴᐤᐦ! ᒣᒀᒡ ᒫᒃ ᑳ ᒥᔪᐦᒀᒥᑦ ᐊᓐ ᓈᐯᔑᔥ, ᒌ ᒋᐦᒋᐎᔨᑯᐤ ᐊᓂᔨᐤᐦ ᐐᐦᑎᑰᔅᑴᐤᐦ ᒉᒌ ᓇᑕᐎ ᒋᐸᐦᐅᑯᑦ ᐊᓂᑌ ᒋᐸᐦᐅᑑᐎᑲᒥᑯᐦᒡ᙮

ᐁᑯᑌ! ᒌ ᐃᑎᑎᓱᐤ ᐊᓂᐦᐁ ᒪᒋ ᐃᔅᑴᐤ, ᓂᑲ ᑖᐦᒋᐳᐦᐋᐤ ᒉᒌ ᒧᐗᒃ!

ᐊᓂᐦᐁ ᐐᐦᑎᑰᔅᑴᐤ ᒌ ᐃᑕᔕᐙᑌᐤ ᐊᓂᔨᐤᐦ ᐃᔥᑴᔑᔕ ᒉ ᐱᒥᓇᐌᔨᒡᐦ ᒉᒌ ᑖᐦᒋᐳᐦᐋᒪᒃ ᐊᓂᔨᐤᐦ ᐐᒋᔖᓂᔨᐤᐦ᙮ ᐊᓂᒌ ᒫᒃ ᐊᐙᔑᔕᒡ ᒌ ᓇᑐᑕᒪᐌᐗᒡ ᒉ ᐐᐦᑯᒋᐦᐃᑯᑣᐤ, ᐱᔑᔑᒄ ᒫᒃ ᒌ ᐅᔑᓈᑯᐗᒡ ᐊᓂᔨᐤᐦ ᐐᐦᑎᑰᔅᑴᐤᐦ᙮

ᐁᑳ ᒫᒃ ᑳ ᓇᐦᐋᐱᑦ ᐊᓂᐦᐁ ᒋᔐᐃᔥᑴᔑᔥ ᒣᔕᑯᒻ ᒌᔑᑳᐤ ᒌ ᑯᑴᑎᓇᒬᐤ ᐅᑎᐦᒌᔨᐤ ᐊᓂᔨᐤᐦ ᓈᐯᔑᔕ ᐁ ᓇᑕᐙᐦᐋᑦ ᑌᐱ ᑖᐦᒋᐳᔨᑴᓐᐦ᙮ ᐯᔭᑾᐤ, ᒌ ᒥᔅᑲᒻ ᐅᔥᑲᓂᔥᒌᔑᔨᐤ ᐊᓂᐦᐁ ᓈᐯᔑᔥ ᐊᓂᑌ ᒋᐸᐦᐅᑑᐎᑲᒥᑯᐦᒡ᙮ ᑳ ᐯᒋ ᓇᑕᐙᐦᐃᑯᑦ ᒫᒃ ᐊᓂᔨᐤᐦ ᐐᐦᑎᑰᔅᑴᐤᐦ, ᐁᐗᑾᓂᔨᐤ ᑳ ᓃᒥᓇᒪᐙᑦ᙮ ᑳ ᑯᑴᑎᓇᒸᑦ ᒫᒃ ᐊᓂᔨᐤ ᐅᔅᑲᓂᔨᐤ ᐊᓂᐦᐁ ᒋᔐᐃᔥᑴᔑᔥ, ᒌ ᐃᑌᔨᒣᐤ ᐁᔥᒄ ᐁ ᐅᓵᒥ ᐸᔅᒉᐌᔨᒡᐦ ᐊᓂᔨᐤᐦ ᓈᐯᔑᔕ᙮ ᐁᒄ ᑳ ᐃᑎᑎᓱᑦ, ᐋᑕ ᑳ ᐊᔕᒫᑲᓂᐎᑦ ᐊᓂᐦᐁ ᓈᐯᔑᔥ, ᓇᒪᐐᔾ ᐐ ᑖᐦᒋᐳᐤ! ᑖᐺ ᒌ ᐴᒣᐦᐁᐤ ᐊᓂᐦᐁ ᐐᐦᑎᑰᔅᑴᐤ᙮

ᑳ ᒉᒋᔐᐹᔮᔨᒡ ᒌ ᐃᑕᔕᐙᑌᐤ ᐊᓂᔨᐤᐦ ᐃᔥᑴᔑᔕ ᒉ ᐲᐦᑎᑌᔮᐦᑕᐐᔨᒡᐦ ᐊᓂᑌ ᒋᔖᐱᔅᒋᓵᐙᓂᐦᒡ ᒉᒌ ᓇᑕᐙᐦᑖᔨᒡᐦ ᑌᐱᐦᑯᔦᔨᑴ ᐃᔥᑯᑌᔨᐤ᙮ ᐃᔥᑴᔑᔥ ᒫᒃ ᒌ ᑯᑴᒋᒣᐤ, ᑖᓐ ᐹᐦᑎᑌᔮᐦᑕᐐᔮᓐ ᐊᓂᑌ ᒋᔖᐱᔅᒋᓵᐙᓂᐦᒡ?

ᑳ ᒋᔑᐙᐦᐃᑯᑦ ᒫᒃ ᐊᓂᐦᐁ ᐐᐦᑎᑰᔅᑴᐤ, ᒌ ᐃᔅᒀᐦᑕᐐᐤ ᒉᒌ ᐙᐸᐦᑎᔮᑦ ᑖᓂᑌ ᒉ ᐃᔑ ᓇᑕᐙᐦᑖᔨᒡᐦ ᐃᔥᑯᑌᔨᐤ᙮ ᓴᔅᒋᑯᒡ ᒫᒃ ᐊᓂᐦᐁ ᐃᔥᑴᔑᔥ ᒌ ᑯᐦᑯᐌᐱᓀᐤ ᐊᓂᔨᐤᐦ ᒪᒋ ᐃᔅᑴᐤᐦ ᒉᒌ ᐴᐦᒋᐸᔨᔨᒡᐦ ᐊᓂᑌ ᒋᔖᐱᔅᒋᓵᐙᓂᐦᒡ᙮

ᐊᓂᒌ ᒫᒃ ᐊᐙᔑᔕᒡ ᒌ ᓵᑲᔥᒋᓇᑖᐗᒡ ᐅᑆᑭᑎᒥᐙᐤᐦ ᑳ ᐅᐦᒋ ᒫᒨᔥᒋᓇᒸᑣᐤ ᐅᒦᔕᒋᓰᐎᓂᔨᐤ ᐊᓂᔨᐤᐦ ᐐᐦᑎᑰᔅᑴᐤᐦ ᐁᒄ ᑳ ᒌᐌᑣᐤ᙮ ᐯᔓᒡ ᒫᒃ ᒌ ᒪᑖᐯᐗᒡ ᐊᓂᑌ ᐁ ᐊᔭᑲᔥᑳᑲᒫᔨᒡ᙮ ᐊᓂᑌ ᒫᒃ ᓈᓯᐯᑎᒥᐦᒡ ᒌ ᐃᐦᑖᔨᐤᐦ ᐙᐱᓯᐤᐦ ᑳ ᒥᔑᒋᑎᔨᒡᐦ ᑳ ᓇᔅᑯᒧᔨᒡᐦ ᒉ ᐋᔕᐗᐦᐅᔨᑯᑣᐤ᙮ ᒉᒃ ᒌ ᒫᑖᒣᐗᒡ ᑳ ᓃᔑᑣᐤ ᐊᓂᔨᐤᐦ ᒣᔅᑲᓈᔨᐤ ᑳ ᒋᔅᒉᔨᐦᑕᐦᒀᐤ᙮

ᒌ ᐅᐦᒋᑲᐙᐱᐤ ᐊᓂᐦᐁ ᓅᑖᐦᑎᑴᓯᐤ ᐁ ᐃᔅᐱᔑ ᒥᔯᔨᐦᑕᐦᒃ ᑳᐤ ᐁ ᐅᐦᒋ ᐙᐸᒫᑦ ᐅᑦᐊᐙᔑᔒᒻᐦ᙮ ᓇᒪᐐᔾ ᒫᒃ ᐅᐦᒋ ᐃᐦᑖᔨᐤᐦ ᐊᓂᔨᐤᐦ ᐐᒋᔅᑴᐤᐦ ᐁ ᒌ ᐌᐱᓈᑦ ᐃᔥᑯᑕᒃ ᑳ ᒋᔅᒉᔨᒫᑦ ᐁ ᐃᔅᐱᔑ ᒪᒋᐦᑣᔨᒡᐦ᙮ ᑳ ᓂᔥᑎᑣᐤ ᒫᒃ ᒌ ᒥᔯᔨᐦᑕᒧᒡ ᐁ ᐃᔅᐱᔑ ᐱᒫᑎᓰᑣᐤ ᐁ ᐅᐦᒋ ᐱᒫᒋᐦᐅᐙᒉᐙᑣᐤ ᐊᓂᔨᐤ ᐅᒦᔕᒋᓰᐎᓂᔨᐤ ᐊᓂᔮᐦ ᐐᐦᑎᑰᔅᑴᐤᐦ᙮

Advertisements

ᒣᐦᑯᔥᑐᑎᓀᔑᑦ

Little_Red_Riding_Hood_pg_8
ᐌᔥᑲᒡ ᒌ ᐃᐦᑖᐤ ᐃᔥᑴᔑᔥ ᑳ ᓵᒋᐦᐃᑯᑦ ᒥᓯᐌ ᐊᐌᔨᐤᐦ ᑳ ᑲᓇᐙᐸᒥᑯᑦ᙮ ᐅᐦᑰᒻᐦ ᒫᒃ ᒫᐗᒡ ᒌ ᓵᒋᐦᐃᑯᐤ ᓀᔥᑦ ᓇᒪᐐᔾ ᒌ ᐃᐦᑕᑾᓂᔨᐤ ᒉᒀᔨᐤ ᐁᑳ ᒉ ᐅᐦᒋ ᒦᔨᑯᑦ᙮ ᐯᔭᒀᐤ ᒌ ᒦᔨᑯᐤ ᑳ ᒥᐦᒀᔑᔨᒡ ᐊᔥᑐᑎᓂᔑᔨᐤ᙮ ᐁᐗᑾᓂᔨᐤ ᒨᔥ ᑳ ᒋᒋᔥᑲᐦᒃ ᐁ ᐃᔅᐱᔑ ᒥᔪᔥᑲᐦᒃ᙮ ᐁᐗᒄ ᐌᐦᒋ ᒌ ᐃᔑᓂᐦᑳᑎᑯᓰᑦ ᒣᐦᑯᔥᑐᑎᓀᔑᑦ᙮

ᐯᔭᒀᐤ ᒌ ᐃᑎᑯᐤ ᐅᑳᐐᐦ, ᐋᔥᑕᒻ ᒣᐦᑯᔥᑐᑎᓀᔑᔭᓐ! ᒫᐤ ᐋᔭᐦᑯᓈᐤ ᓀᔥᑦ ᔔᒥᓈᐴ᙮ ᐃᑐᐦᑕᑕᒪᐤ ᐆᔨᐤᐦ ᑰᐦᑯᒻ᙮ ᐋᐦᑯᓯᐤ ᓀᔥᑕ ᓃᔭᒥᓰᐤ ᑰᐦᑯᒻ᙮ ᑲᑕ ᒥᔪᔥᑳᑯᐤ ᐆᔨᐤ ᒦᒋᒥᔨᐤ᙮ ᒋᐦᑐᐦᑌᐦ ᐁᔥᒄ ᐁᑳ ᐁ ᒋᔖᔥᑌᒡ᙮ ᐌᐌᔭᑦ ᒫᒃ ᐱᒧᐦᑌᐦ ᓀᔥᑦ ᐁᑳᐐᔾ ᐸᑐᑌᔅᑲᓇᐌᐦᑌᐦ ᐁᑳ ᒉ ᐅᐦᒋ ᐲᑯᐦᑎᑖᔭᓐ ᐆᐦᐁ ᐴᑕᔾ᙮ ᐲᑯᐦᑎᓂᔨᒉ ᒫᒃ ᓇᒪᐐᔾ ᑲᑕ ᐊᔮᐤ ᒉᒀᔨᐤ ᑰᐦᑯᒻ᙮ ᐲᐦᑐᒉᔭᓀ ᒫᒃ, ᐁᑳᐐᔾ ᐗᓂ ᒋᔅᒋᓯ ᒉ ᐴᔔᐦᑲᐗᑦ ᑰᐦᑯᒻ ᓀᔥᑦ ᐁᑳᐐᔾ ᐱᓯᔅᒉᔨᐦᑕᐦ ᒉᒀᓐ ᑆᒧᔥ ᐴᔔᐦᑲᐗᑌ᙮

ᓂᑲ ᔮᒀᒥᓰᓐ! ᒌ ᐃᑌᐤ ᒣᐦᑯᔥᑐᑎᓀᔑᑦ ᐁ ᐊᔓᑕᒪᐙᑦ ᐅᑳᐐᐦ᙮ ᐅᐦᑯᒻᐦ ᐊᓂᑌ ᓅᐦᒋᒦᐦᒡ ᒌ ᐐᒋᔨᐤᐦ, ᐗᔦᔥ ᓂᑯᑣᓱ ᑎᐸᐦᐃᑲᓐ ᐅᑌᓈᐦᒡ ᐅᐦᒋ᙮ ᐁᒄ ᑳ ᐊᑎ ᑯᑖᐙᔅᑯᐦᐊᐦᒃ ᒣᐦᑯᔥᑐᑎᓀᔑᑦ ᒌ ᓇᒋᔥᑲᐌᐤ ᒪᐦᐄᐦᑲᓐᐦ᙮ ᓇᒪᐐᔾ ᐅᐦᒋ ᒋᔅᒉᔨᒣᐤ ᒣᐦᑯᔥᑐᑎᓀᔑᑦ ᑖᓐ ᐁᔅᐱᔑ ᒫᔮᑎᓰᔨᒡᐦ ᐊᓂᔨᐤᐦ ᒪᐦᐄᐦᑲᓐᐦ᙮

ᒥᔪ ᒌᔑᑳᐤ, ᓇᒪ, ᒣᐦᑯᔥᑐᑎᓀᔑᔭᓐ? ᒌ ᐃᑗᐤ

ᑖᐺ ᒥᔪ ᒌᔑᑳᐤ, ᒪᐦᐄᐦᑲᓐ᙮

ᑖᓂᑌ ᐁᑐᐦᑌᔭᓐ ᐐᐸᒡ ᒉᒋᔐᑉ, ᒣᐦᑯᔥᑐᑎᓀᔑᔭᓐ?

ᓅᐦᑯᒻ ᐐᒋᐦᒡ᙮

ᒉᒀᓐ ᐁᔮᔭᓐ ᐊᓂᑌ ᒌᐗᑎᐦᒡ?

ᐋᔭᐦᑯᓈᐤ ᓀᔥᑦ ᔔᒥᓈᐴ᙮ ᒌ ᐋᔭᐦᑯᓈᐦᑳᓂᐎᐤ ᐅᑖᑯᔒᐦᒡ᙮ ᑳ ᒋᑎᒫᒋᓰᑦ ᓅᐦᑯᒻ ᑲᑕ ᐊᔮᐤ ᒉᒀᔨᐤ ᐁ ᒥᔻᔨᒡ ᐊᐗᓯᑌ ᒉ ᒥᔻᒋᐦᐃᑯᑦ᙮

ᑖᓂᑌ ᐙᒋᑦ ᑰᐦᑯᒻ, ᒣᐦᑯᔥᑐᑎᓀᔑᔭᓐ?

ᐊᐗᓯᑌ ᐊᓂᑌ ᓅᐦᒋᒦᐦᒡ, ᐋᐱᐦᑕᐎ ᑎᐸᐦᐃᑲᓐ ᐗᔦᔥ᙮ ᔒᐹ ᐊᓂᑌ ᒥᔥᑎᑯᒥᓈᐦᑎᑯᐦᒡ ᐃᐦᑕᑾᓂᔨᐤ ᐐᒡ᙮ ᐯᔓᒡ ᐊᓂᑌ ᑳ ᐃᐦᑖᑣᐤ ᐊᓂᒌ ᐸᑳᓈᐦᑎᑯᒡ᙮ ᒉᒫᓂᒻ ᒋᒋᔅᒉᔨᐦᑕᒸᓐ ᑖᓂᑕ ᐁ ᐐᒋᑦ᙮ ᒌ ᓇᔥᑴᐗᔑᐦᐁᐤ ᒣᐦᑯᔥᑐᑎᓀᔑᑦ᙮

ᐊᓂᐦᐁ ᒪᐦᐄᐦᑲᓐ ᒌ ᐃᑎᑎᓱᐤ, ᐙ ᒪᔫᒉᐗᒋᓈᑯᓯᑦ ᐆ ᐃᔥᑴᔑᔥ! ᐊᐗᓯᑌ ᐐᐦᒋᑏᑐᒉ ᐃᔅᐱᔖᑦ ᐊᓂᔨᐤᐦ ᒋᔐᐃᔥᑴᔑᔕ᙮ ᒌᒨᒡ ᓂᐸ ᐊᔨᐦᑎᓐ ᑖᐱᔅᑰᒡ ᐐ ᒧᐗᒀᐌᓂᒡ᙮ ᐱᑕᒫ ᒫᒃ ᒌ ᐐᒉᐌᐤ ᒣᐦᑯᔥᑐᑎᓀᔑᔨᒡᐦ᙮ ᐁᒄ ᑳ ᐃᑖᑦ, ᒋᐙᐸᐦᑌᓐ ᐋ, ᒣᐦᑯᔥᑐᑎᓀᔑᔭᓐ, ᑖᓐ ᐁᔅᐱᔑ ᒥᔻᔑᒀᐤᐦ ᐙᐱᑯᓃᐦ? ᒉᒀᓐ ᐌᐦᒋ ᐁᑳ ᐊᔨᑖᐱᔭᓐ? ᓂᑦᐃᑌᔨᐦᑌᓐ ᓀᔥᑦ ᐁᑳ ᐯᐦᑕᐗᑣᐤ ᐱᔦᔒᔕᒡ ᐁ ᓂᑲᒧᑣᐤ᙮ ᒋᒪᒉᔨᐦᑕᒨᓈᑯᓯᓐ ᐁ ᐱᒧᐦᑌᔭᓐ ᒬᐦᒡ ᐁ ᐃᑐᐦᑌᔭᓐ ᐊᓂᑌ ᒋᔅᒋᓄᐦᐊᒫᑑᐎᑲᒥᑯᐦᒡ᙮ ᒨᒋᑫᔨᐦᑕᒧᒡ ᒫᒃ ᑯᑕᑲᒡ ᐊᐌᓂᒌ ᐆᑌ ᓅᐦᒋᒦᐦᒡ ᐁ ᐃᐦᑖᑣᐤ᙮

ᐁᒄ ᑳ ᑕᔅᑕᓵᐱᑦ ᒣᐦᑯᔥᑐᑎᓀᔑᑦ᙮ ᐃᔥᑯᑕᒃ ᒫᒃ ᑳ ᐙᐸᐦᑕᐦᒃ ᐊᓂᔨᐤ ᐲᓯᒬᔮᐲᔨᐤ ᐁ ᓃᒦᒪᑲᓂᔨᒡ ᓀᔥᑦ ᐊᓂᔨᐤᐦ ᐙᐱᑯᓃᐦ ᑳ ᓂᐦᑖᐎᒋᓂᔨᒀᐤᐦ ᐊᓂᑌ ᒥᓯᐌᔅᑲᒥᒡ, ᒌ ᐃᑎᑎᓱᐤ, ᒫᒨᔥᒋᓇᒪᐗᑫ ᐙᐱᑯᓃᐦ ᓅᐦᑯᒻ, ᑖᐺ ᒋᐸ ᒥᔯᔨᐦᑕᒻ᙮ ᔮᐱᒡ ᓂᑲ ᒉᓯᔅᑲᐙᐤ ᓅᐦᑯᒻ ᐌᔅ ᐐᐸᒡ ᓂᒌ ᒋᐦᑐᐦᑌᓐ᙮ ᐁᒄ ᑳ ᐸᑐᑌᔅᑲᓇᐌᐸᐦᑖᑦ ᐁ ᓈᓇᑕᐙᐱᑯᓀᑦ᙮ ᑕᐦᑣᐤ ᒫᒃ ᑳ ᒪᓂᐱᑕᐦᒃ ᐙᐱᑯᓃᔨᐤ ᒦᓐ ᑯᑕᒋᔨᐤ ᒌ ᐙᐸᐦᑕᒻ ᐊᐗᓯᑌ ᐁ ᒧᔥᑌᓇᐦᒃ᙮ ᒉᒃ ᒫᒃ ᑳ ᔮᐎᓈᑯᓯᑦ ᐊᓂᑌ ᐅᐦᒋ ᒣᔅᑲᓈᐦᒡ᙮

ᐁᒄ ᒫᒃ ᐐᔾ ᐊᓂᐦᐁ ᒪᐦᐄᐦᑲᓐ ᑳ ᐃᔅᐸᐦᑖᐙᑦ ᐐᒋᔩᐦᒡ ᐊᓂᔨᐤᐦ ᐅᐦᑯᒥᒫᐤᐦ᙮ ᐁᒄ ᑳ ᐹᐦᐹᐗᐦᐃᒉᑦ᙮

ᐊᐌᓐ ᒌᔾ?

ᒣᐦᑯᔥᑐᑎᓀᔑᑦ, ᒌ ᓇᔥᑴᐗᔑᐦᐁᐤ ᐊᓂᔨᐤᐦ ᐊᓐ ᒪᐦᐄᐦᑲᓐ᙮ ᒋᐯᑕᒫᒄ ᔔᒥᓈᐴᔨᐤᐦ ᓀᔥᑦ ᐋᔭᐦᑯᓈᐤᐦ; ᐯᒋ ᐋᐸᐦᐅ ᐃᔥᒀᐦᑌᒻᐦ᙮

ᐅᐦᐹᐱᔅᒋᓐᐦ ᐋᑖᐱᔅᑲᐦᐃᑲᓐ! ᒌ ᑌᐺᐤ ᐁ ᒋᔗᐌᑦ ᐊᓐ ᐅᐦᑯᒥᒫᐤ, ᐌᓵ ᓂᓃᔭᒥᓰᓐ᙮ ᓇᒪᐐᔾ ᒫᒃ ᓂᒌ ᐸᓯᑰᓐ᙮

ᐃᔥᑯᑕᒃ ᑳ ᐅᐦᐹᐱᔅᒋᓇᐦᒃ ᐊᓂᔨᐤ ᐋᑖᐱᔅᑲᐦᐃᑲᓂᔨᐤ ᐊᓐ ᒪᐦᐄᐦᑲᓐ, ᒌ ᐋᐸᐦᐃᐸᔨᔨᐤᐦ ᐃᔥᒀᐦᑌᒻᐦ᙮ ᐁᒄ ᒌᔖᒡ ᑳ ᓈᑕᒸᑦ ᐅᓂᐯᐎᓂᔨᐤ ᐊᓂᔨᐤᐦ ᐅᐦᑯᒥᒫᐤᐦ ᒉ ᒧᐙᑦ᙮ ᐁᒄ ᑳ ᐳᔥᑎᔥᑲᒸᑦ ᐅᓂᐯᐗᔮᓂᔨᐤ ᓀᔥᑦ ᐅᑦᐊᔥᑐᑎᓂᔨᐤ᙮ ᐁᒄ ᑳ ᐗᐌᔨᔑᐦᒃ ᐊᓂᑌ ᓂᐯᐎᓂᐦᒡ ᓀᔥᑦ ᑳ ᐋᑲᐌᔦᒋᐱᒋᒉᑦ᙮

ᐐᔾ ᒫᒃ ᒣᐦᑯᔥᑐᑎᓀᔑᑦ ᐁᔥᒄ ᒌ ᐸᐹᒥᐸᐦᑖᐤ ᐁ ᒫᒨᔥᒋᓇᐦᒃ ᐙᐱᑯᓃᐦ᙮ ᐃᔥᑯᑕᒃ ᒫᒃ ᐁᑳ ᑳ ᑌᐱᓇᐦᒃ ᐌᔅ ᒥᐦᒉᑦ ᐁ ᒌ ᒫᒨᔥᒋᓇᐦᒃ, ᒌ ᒋᔅᒋᓯᑐᑕᐌᐤ ᐅᐦᑯᒻᐦ᙮ ᐁᒄ ᒫᒃ ᒦᓐ ᑳ ᒋᐦᑐᐦᑌᐙᑦ᙮

ᒌ ᑯᔥᑴᔨᐦᑕᒻ ᒫᒃ ᐁ ᐙᐸᒫᑦ ᐃᔥᒀᐦᑌᒻᐦ ᐁ ᐋᐸᐦᐊᑯᒋᓂᔨᒡᐦ᙮ ᑳ ᐲᐦᑐᒉᑦ ᒫᒃ ᒌ ᐃᑎᑎᓱᐤ ᐁ ᐊᒪᑎᓱᑦ, ᐁᒄ ᐌᓵ! ᒨᔥ ᓂᒥᔯᔨᐦᑕᒸᓐ ᐁ ᐙᐸᒪᒃ ᓅᐦᑯᒻ᙮ ᒉᒀᔨᐤ ᒫᒃ ᐌᐦᒋ ᐁᑳ ᔖᐯᔨᒪᒃ ᐊᓄᐦᒌᔥ? ᒌ ᑌᐺᐤ ᐁ ᒋᔗᐌᑦ, ᑴᔾ ᑴᔾ! ᒥᒄ ᒫᒃ ᓇᒪᐐᔾ ᐅᐦᒋ ᓇᔥᑴᐗᔑᐦᐋᑲᓂᐎᐤ᙮ ᐁᒄ ᑳ ᐲᐦᑐᒉᑦ ᐊᓂᑌ ᓂᐯᐎᑲᒥᑯᐦᒡ ᓀᔥᑦ ᑳ ᐹᔅᒉᒋᐱᒋᒉᑦ᙮

ᐁᑯᑕ ᑳ ᐱᒫᔅᑯᔑᓂᔨᒡᐦ ᐊᓂᔨᐤᐦ ᒪᐦᐄᐦᑲᓐᐦ ᐁ ᐊᑯᓈᐦᑴᔑᓂᔨᒡᐦ, ᓇᐗᒡ ᐁ ᒫᒪᔅᑳᓯᓈᑯᓯᔨᒡᐦ᙮

ᐌᓵ ᓅᐦᑯᒻ! ᒌ ᐃᑌᐤ, ᑖᐺ ᒋᒫᒪᐦᒋᐦᑕᐗᒉᓐ!

ᐊᐗᓯᑌ ᒉ ᓇᐦᐃᐦᑖᑖᓐ ᓅᓯᓯᒻ! ᒌ ᓇᔥᑴᐗᔑᐦᐃᑯᐤ᙮

ᒫᒃ ᓅᐦᑯᒻ, ᑖᐺ ᒋᒫᒪᐦᑲᒑᐱᓐ! ᒌ ᐃᑌᐤ᙮

ᐊᐗᓯᑌ ᒉ ᓇᐦᐋᐸᒥᑖᓐ ᓅᓯᓯᒻ!

ᒫᒃ ᓅᐦᑯᒻ, ᑖᐺ ᒋᒫᒪᐦᒋᑎᐦᒉᓐ!

ᐊᐗᓯᑌ ᒉ ᒥᔪ ᐌᐗᒋᑴᓂᑖᓐ!

ᐌᓵ! ᓅᐦᑯᒻ, ᑖᐺ ᒋᒫᒪᐦᑳᐱᑌᓐ!

ᐊᐗᓯᑌ ᒉ ᒥᔪ ᒨᑖᓐ!

ᓴᔅᒋᑯᒡ ᑳ ᐗᓂᔥᑳᐸᐦᑖᑦ ᐊᓂᐦᐁ ᒪᐦᐄᐦᑲᓐ ᒉ ᒧᐙᑦ ᒣᐦᑯᔥᑐᑎᓀᔑᔨᒡᐦ᙮

ᐁᒄ ᑳ ᒌᔥᐳᑦ ᐊᓂᐦᐁ ᒪᐦᐄᐦᑲᓐ, ᒌ ᑲᐎᔑᒧᐤ᙮ ᑳ ᑲᐎᐦᑯᔑᑦ ᒫᒃ, ᒌ ᐊᑎ ᒪᑗᐦᒀᒥᐤ᙮ ᒣᒀᒡ ᑳ ᓂᐹᔨᒡᐦ, ᒌ ᒥᔮᔥᑲᒻ ᐊᓂᔨᐤ ᐙᔅᑳᐦᐃᑲᓂᔨᐤ ᐃᔨᓂᐤ ᑳ ᓇᑕᐗᐦᐅᑦ᙮ ᒌ ᐃᑎᑎᓱᐤ ᐊᓂᐦᐁ ᓈᐯᐤ, ᐁᒄ ᐌᓵ ᒋᔗᐌ ᒪᑗᐦᒀᒥᐤ ᐊᓂᐦᐁ ᒋᔐᐃᔥᑴᔑᔥ᙮ ᓂᐸ ᑲᑴᒋᒫᐤ ᓇᑕᐌᔨᐦᑕᒧᑴ ᒉᒀᔨᐤ᙮ ᐁᒄ ᑳ ᐲᐦᑐᒉᐙᑦ ᐊᓂᑌ ᐅᐙᔅᑳᐦᐃᑲᓂᒥᔩᐦᒡ, ᑳ ᓈᑕᒸᑦ ᐅᓂᐯᐎᓂᔨᐤ, ᒉᒃ ᒌ ᐙᐸᒣᐤ ᐊᓂᔨᐤᐦ ᒪᐦᐄᐦᑲᓐᐦ ᑳ ᐱᒥᔑᓂᔨᒡᐦ᙮ ᐆᑌ ᐋ ᒋᒥᔅᑳᑎᓐ ᒌᔾ ᑳ ᒪᒋᐦᑣᔭᓐ! ᒌ ᐃᑗᐤ, ᐋᔥ ᐌᔥᑲᒡ ᒋᓈᓇᑕᐙᐸᒥᑎᓐ! ᐁᒄ ᒬᐦᒡ ᑳ ᐐ ᐹᔅᒋᔂᑦ ᐊᓂᔨᐤᐦ ᒪᐦᐄᐦᑲᓐᐦ, ᒌ ᐃᑌᔨᐦᑕᒻ ᒫᔥᑯᒡ ᐁᔥᒄ ᐁ ᐃᔨᓃᐎᑴᓐᐦ ᐊᓂᔨᐤᐦ ᐅᐦᑯᒥᒫᐤᐦ᙮ ᑳ ᐐ ᐱᒫᒋᐦᐋᑦ ᒫᒃ ᐊᓂᔨᐤᐦ, ᓇᒪᐐᔾ ᐅᐦᒋ ᐹᔅᒋᓯᒉᐤ᙮ ᒌ ᑕᐦᑯᓇᒻ ᒫᒃ ᑕᑯᐦᑯᒫᓂᔨᐤ, ᐁᒄ ᑳ ᑖᑐᔕᒸᑦ ᐗᑖᔨᐤ ᐊᓂᔨᐤᐦ ᒪᐦᐄᐦᑲᓐᐦ᙮ ᐊᐱᔒᔥ ᒥᒄ ᑳ ᒫᑎᔑᒉᑦ, ᒌ ᐙᐸᐦᑕᒻ ᑳ ᒥᐦᒀᔨᒡ ᐊᔥᑐᑎᓂᔨᐤ᙮ ᐊᐱᔒᔥ ᒦᓐ ᑳ ᒫᑎᔑᒉᑦ, ᐁᒄ ᑳ ᐗᔭᐐ ᒀᔥᑯᐦᑎᔨᒡᐦ ᐊᓂᔨᐤᐦ ᐃᔥᑴᔑᔕ ᐁ ᒫᑐᔨᒡᐦ ᐁ ᐃᑗᔨᒡᐦ, ᐌᓵ ᓂᒌ ᓭᒋᓯᓐ ᐁ ᐗᓂ ᑎᐱᔅᑳᔨᒡ ᐊᓂᑌ ᐲᐦᒋᔭᐤ᙮ ᐁᒄ ᓈᒉᔒᔥ ᐊᓐ ᐅᐦᑯᒥᒫᐤ ᐌᔥᑕᐐᔾ ᑳ ᐯᒋ ᐗᔭᐐᑦ ᐁ ᓅᐦᑌᑖᒧᑦ᙮ ᒣᐦᑯᔥᑐᑎᓀᔑᑦ ᒫᒃ ᒌ ᓈᑌᐤ ᐊᓯᓃᐦ ᐁ ᑯᓯᒀᐱᔅᒋᓯᔨᑣᐤᐦ ᒉ ᐋᐸᒋᐦᐋᑦ ᒉᒌ ᓵᑲᔥᒋᓇᑖᐙᑦ ᐗᑖᔨᐤ ᐊᓂᔨᐤᐦ ᒪᐦᐄᐦᑲᓐᐦ᙮ ᐃᔥᑯᑕᒃ ᒫᒃ ᑳ ᐗᓂᔥᑳᑦ ᐊᓐ ᒪᐦᐄᐦᑲᓐ ᒌ ᓂᐸᐦᐃᔑᓄ ᐁ ᑯᑴ ᒋᐦᒋᐸᐦᑖᑦ᙮

ᐁᒄ ᑳ ᒥᔯᔨᐦᑕᐦᒀᐤ ᑳ ᓂᔥᑎᑣᐤ᙮ ᐊᓂᐦᐁ ᐃᔨᓂᐤ ᑳ ᓇᑕᐗᐦᐅᑦ ᒌ ᐸᐦᑯᓀᐤ ᐊᓂᔨᐤᐦ ᒪᐦᐄᐦᑲᓐᐦ, ᐁᒄ ᑳ ᒌᐌᐦᑕᐦᐋᑦ ᐊᓂᔨᐤᐦ ᒪᐦᐄᐦᑲᓂᐗᔮᓐᐦ᙮ ᐊᓂᐦᐁ ᒫᒃ ᐅᐦᑯᒥᒫᐤ ᑳ ᒥᔻᒋᐦᐃᑯᑦ ᐁ ᒧᐙᑦ ᐊᓂᔨᐤᐦ ᐋᔭᐦᑯᓈᐤᐦ ᓀᔥᑦ ᐁ ᒥᓂᐦᑴᑦ ᐊᓂᔨᐤ ᔔᒥᓈᐴᔨᐤ ᑳ ᐯᑕᒫᑯᑦ ᒣᐦᑯᔥᑐᑎᓀᔑᔨᒡᐦ᙮ ᐊᓂᐦᐁ ᒫᒃ ᐃᔥᑴᔑᔥ ᑳ ᐃᑎᑎᓱᑦ, ᓇᒪᐐᔾ ᒦᓐ ᐐᔅᑳᒡ ᓂᑲ ᐅᐦᒋ ᐸᑐᑌᔅᑲᓇᐌᐦᑌᓐ ᐁ ᐯᔭᑯᔑᔮᓐ ᐊᓂᑌ ᓅᐦᒋᒦᐦᒡ᙮

Mehkoštotinešit

Little_Red_Riding_Hood_pg_8
Weškac kî ihtâw iškwešiš kâ sâkihikot misiwe aweliwa kâ kanawâpamikot. Ohkoma mâka mâwac kî sâkihikow nešta môla kî ihtakwaniliw kekwâliw ekâ ke ohci-mîlikot. Peyakwâw kî mîlikow kâ mihkwâlik aštotiniliw. Ewakwânimeliw môšak kâ kikiškahk e ispihci-miloškahk. Ewako wehci kî išinihkâtikosît Mehkoštotinešit.

Peyakwâw kî itikow okâwiya, “štam Mehkoštotinešiyan! Mâtikôwa âlahkonâw nešta šôminâpow. Itohtatamaw ôhi kôhkom. Âhkosiw nešta lîlamisîw kôhkom. Kata miloškâkow ômeliw mîcimiliw. Kihtohte eškwa ekâ e kišâštek. Wewelat mâka pimohte nešta ekâwîla patoteskanawehte ekâ ke ohci-pîkohtitâyan ôma pîwâpiskolâkan. Pîkohtinilike mâka môla kata ayâw kekwâliw kôhkom. Pîhtokeyane mâka, ekâwîla wani-kiskisi kici atamiskawat kôhkom nešta ekâwîla pisiskelihta kekwân pwâmoši atamiskawate.

“Nika ayâkwâmisîn,” kî itew Mehkoštotinešit e ašotamawât okâwiya. Ohkoma ante nôhcimihk kî tašîhkeliwa, wayeš nikotwâso-tipahikan otenâhk ohci. Eko kâ ati kotâwâskohahk Mehkoštotinešit kî nakiškawew mahîhkana. Môla ohci-kiskelimew Mehkoštotinešit tâni espihci-mâlâtisilici anihi mahîhkana.

“Milo-kîšikâw nama, Mehkoštotinešiyan?” Kî itwew

“Tâpwe milo-kîšikâw, Mahîhkan.”

“Tânte etohteyan wîpac kekišep, Mehkoštotinešiyan?”

“Nôhkom wîkihk.”

“Kekwân eyâyan ante kîwatihk?”

“Âlahkonâw nešta šôminâpow. Kî âlahkonâhkâniwan otâkošihk. Kâ kitimâkisit nôhkom kata ayâw kekwâliw e milwâlik awasite ke milwâcihikot.”

“Tânte wâkit kôhkom, Mehkoštotinešiyan?”

“Awasite ante nôhcimihk, âpihtawi-tipahikan wayeš. Šîpâ ante mištikominâhtikohk ihtakwaniliw wîki. Pešoc ante kâ ihtâcik aniki pakânâhtikwak. Cikema ki kiskelihten ita e wîkit.” kî naškwewašihew Mehkoštotinešit.

Ana mahîhkan kî ititisow, “Wâ malôkewakinâkosit awa iškwešiš! Awasite wîhkitišîtoke ispiš anihi nôtokewa! Kîmôc nika ayihtihtay tâpiskôc wî mowakwâwe.” Pitamâ mâka kî wîcewew Mehkoštotinešilici. Eko kâ itât, “Ki wâpahten-nâ, Mehkoštotinešiyan, tâni espihci-milwâšihki wâpikwaniya? Kekwân wehci ekâ ayitâpiyan? Nit itelihten nešta ekâ pehtawacik pilešîšak e nikamocik. Ki macelihtamônâkosin e pimohteyan tâpiskôc e itohteyan ante kiskinohamâtôwikamikohk. Môcikelihtamwak mâka kotakiyak aweniki ôte nôhcimihk e ihtâcik.”

Eko kâ tastasâpit Mehkoštotinešit. Ispi mâka kâ wâpahtahk animeliw pîsimweyâpîliw e išinâkwanilik e nîmîmakanilik nešta anihi wâpikwaniya kâ nihtâwikiniliki ante misiweskamik, kî ititisow, “Mâmôškinamawake wâpikwaniya nôhkom, tâpwe kika milwelihtamôpan. Keyâpac nika kesiskawâw nôhkom wesa wîpac nikî kihtohtân.” Eko kâ patoteskanawepahtât e nânatawâpikwanet. Tahtwâw mâka kâ manipitahk wâpikwanîliw mîna kotakîliw kî wâpahtam awasite e moštenahk. Keka mâka kâ lâwinâkosit ante ohci meskanâhk.

Eko mâka wîla mahîhkan kâ ispahtâwât wîkilîhk anihi ohkomimâwa. Eko kâ pâhpawahiket.

“Awena kîla?”

“Mehkoštotinešit,” kî naškwewašihew anihi ana mahîhkan. “Ki petamâkw šôminâpôliw nešta âlahkonâwa; Peci-âpahamaw iškwâhtemiliw.”

“Ohpâpiskina âtâpiskahikan,” kî tepwew e kišîwet ana ohkomimâw, “Wesâ ni lîlamisîn. Môla mâka nikî pasikôn.”

Ispi kâ ohpâpiskinahk aniheliw âtâpiskahikaniliw ana mahîhkan, kî âpahikâteliw iškwâhtemiliw. Eko kîšâc kâ nâtamwât onipewiniliw anihi ohkomimâwa kici mowât. Eko kâ poštiškamwât onipew-ayâniliw nešta ot aštotiniliw. Eko kâ wawelišihk ante nipewinihk nešta kâ âkawekipiciket.

Wîla mâka Mehkoštotinešit eškwa kî papâmipahtâw e mâmôškinahk wâpikwaniya. Ispi mâka ekâ kâ tepinahk wesâ mihcetw e kî mâmôškinahk, kî kiskisitotawew ohkoma. Eko mâka mîna kâ kihtohtet.

Kî koškwelihtam e wâpahtahk iškwâhtemiliw e âpahaštelik. Kâ pîhtoket mâka kî ititisow e amatisot, “Kišâštaw! Môšak ni milwelihtamwân e wâpamak nôhkom. Kekwâliw mâka wehci ekâ šâpelimak anohc?” Kî tepwew e kišwewet, “Kwey!” Piko mâka môla ohci-naškwewašihâkaniwiw. Eko kâ pîhtoket ante nipewikamikohk nešta kâ pâskekipiciket.

Ekota kâ pimišinilici anihi mahîhkana e akwanâhkwešinilici, nawac e mâmaskâsinâkosilici.

“Wesâ nôhkom!” Kî itew, “Tâpwe ki mâmahkihtawaken!”

“Awasite ke nahihtâtân nôsisim,” kî naškwewašihikow.

“Mâka nôhkom, tâpwe ki mâmahkacâpin!” kî itew.

“Awasite ke nahâpamitân nôsisim!”

“Mâka nôhkom, tâpwe ki mâmahkicihcen!”

“Awasite ke milo-wewakikwenitân!”

“Kišâštaw! Nôhkom, tâpwe ki mâmahkâpiten!”

“Awasite ke milo-môtân!”

Eko ketahtawel kâ wâniškâpahtât ana mahîhkan kici mowât Mehkoštotinešilici.

Eko kâ kîšpot ana mahîhkan, kî kawišimow. Kâ kawihkwašit mâka, kî ati matwehkwâmiw. Mekwâc kâ nipâlici, kî miyâškam aniheliw wâskâhikaniliw nâpew kâ natawahot. Kî ititisow ana nâpew, “Eko wesâ kišwewe-matwehkwâmiw ana nôtokew! Nika kakwecimâhtay natawelihtamokwe kekwâliw.” Eko kâ pîhtoket, kâ pešwâpahtahk animeliw nipewiniliw, kî wâpamew anihi mahîhkana kâ pimišinilici. “Ôte-nâ ki miskâtin omacihtwâw!” kî itwew. “šay weškac ki nânatawâpamitin!” Eko mwehc kâ wî pâskiswât anihi mahîhkana, kî itelihtam mâškoc eškwa e ililîwilici anihi ohkomimâwa. Kâ wî pimâcihât mâka anihi, môla ohci-pâskisikew. Kî tahkonam tahkohkomâniliw, eko kâ tâtošamwât watâliw anihi mahîhkana. Apišîš piko kâ mâtišiket, kî wâpahtam kâ mihkwâlik aštotiniliw. Apišîš mîn kâ mâtišiket, eko kâ walawî-kwâškohtilici anihi iškwešiša e mâtolici e itwelici, “Wesâ nikî sekisin e wani-tipiskâlik ante pîhcilaw.” Eko nâkešîš ana ohkomimâw weštawîla kâ peci-walawît e lehlepalit. Mehkoštotinešit mâka kî nâtew asiniya e kosikotilici ke âpacihât kici sâkaškinatâwât watâliw anihi mahîhkana. Ispi mâka kâ waniškât ana mahîhkan kî nipahišin e kakwe-kihcipahtât.

Eko kâ milwelihtahkik kâ ništicik. Ana kâ natawahot kî pahkonew anihi mahîhkana, eko kâ kîwehtahât anihi mahîhkaniwayâna. Ana ohkomimâw kî milwâcihikow e mowât anihi âlahkonâwa nešta e minihkwet aniheliw šôminâpôliw kâ petamâkot Mehkoštotinešilici. Ana mâka iškwešis kî ititisow, “Môla wîskâc nika ohci-patoteskanawehtân e peyakoyân ante nôhcimihk.”

Kâ Wîcišânitocik

Hänsel_und_Gretel
Weškac  ante cîkâske kitimâkisit onôtâhtikwew kî wîci-tašîhkemew wîwa nešta ot awâšimiša kâ nîšilici. Peyakwâw mâka e takwâkihk kî nôhtehkatâniwan. Ana nâpew môla ohci kî ašamew wîwa nešta ot awâšimiša. Anihi wîwa kî ayâkwâmimikow kici kawahkatelici ot awâšimišiwâwa. Peyakwâw mâka e tipiskâlik kî itikow wîwa kici išiwilât anihi awâšiša ante nôhcimihk kici nakatâkaniwilici.

Okosisimâw mâka kâ kâhcici-pehtahk animeliw e itwâniwanilik kâ wîhtamawât omisa. Âta mâka tâpiškôc kâ koštâcicik keyâpic kî wawelîwak kâ wîcišânitocik. Kâ âpihtâ-tipiskâlik e išpakocinilici tipiski-pîsimwa, kayâm kî nisâwîw ana nâpešiš kici walawît e wî natawi-mâmôškinât asiniya kâ wâpâpiskisilici. Kî sâkaškinatâw opwâkitim.

Eko kâ kekišepâyâlik, aniki awâšišak kî kihciwilikowak ohtâwîwâw e wî nâcinihtelici. Mekwâc mâka e pimohtet nâpešiš, kîmôc kî pâhpakitinew asiniya kici kiskinawâcihtât omeskanaw.

Wâhlaw ante e mištikoskâlik, kî kotawatew ana ohtâwîmâw anihi ot awâšimiša eko kâ kawišimonahât. Mekwâc mâka e nipâlici, kî nakatew anihi awâšiša. Âlahkonâwa piko kî nakatamawew kici mîcisolici. šay mâka kâ wawelîcik aniki awâšišak nakiskaw piko kî nipâšiwak. Eko kâ kîšikâštelik, kî nôsonehwewak anihi asiniya kâ wâsihkwâpiskisilici kici mitimecik. Ispi kâ wâpamât ana wîwimâw anihi awâšiša e takošinilici kî itwâsow e milwelihtamwât,  piko mâka tâpwe kî kišiwelimew e kî takošinilici.

Mîna kâšikâlik kî itašawâtew onâpema mîna kici itohtahâlici ot awâšimišiwâwa ante nôhcimihk. Awasite wâhlaw kî itohtahew ot awâšimiša ana nâpew. Ekâ mâka kâ ayâwât asiniya ana nâpešiš, kî pikiškipitew ot âlahkonâma kici kiskinawâcihtât omeskanaw. Piko mâka pilešîša kî moweliwa anihi âlahkonâwa kâ pâhpakitinât. Môla mâka ohci kî miskam meskanâliw ana nâpešiš ke kî kîwecik.

Kâ wâpanilik mâka ana iškwešiš kî pisiskâpamew pilešîša e wâpisilici. Kî nôsonehwewak aniki awâšišak anihi pilešîša e ispihci-milohtawâcik pîliš e miskahkik wâskâhikaniliw kâ mâmaskâsinâkwanilikipan. Âlahkonâhk išinâkwanôpan anima wâskâhikan. Apahkwân mâka išinâkwanôpan kâ aspaštamâniwahk šôkâw kâ pimîwinâkwahk ohci. Eko aniki awâšišak kî pahkwehtamwak wâskâhikaniliw e ispihci-šîwatecik. Ispi kâ saskamocik, kî pehtawewak aweliwa e itikocik,

“Âpikošîšihk itihtâkosiw!

Awena mâcit ni wâskâhikaniliw?”

Kî âpahikâtew iškwâhtem, eko kâ nôkosit e walawîkâpawit kiše-iskwew e macinâkosit. Ana iskwew kî pâhpihkwelîštawew awâšiša eko kâ pîhtokahât. Kâ wâpamât e ispihci-šîwatelici, kî ašamew pôtina nešta mîniša. Eko kâ kawišimonahât.

Aniki kâ wîcišânitocik môla ohci-kiskelimewak anihi iskwewa kâ milo-tôtâkocik kihciwe kâ wîhtikôskwewilici! Mekwâc mâka kâ milohkwâmit ana nâpešiš, kî kihciwilikow anihi wîhtikôskwewa kici natawi-kipahokot ante kipahotôwikamikohk.

“Eko!” Kî itwew ana wîhtikôskwew, “nika tâhcipohâw kici mowak!”

Ana wîhtikôskwew kî itašawâtew anihi iškwešiša kici piminawelici e wî tâhcipohât nâpešiša. Aniki awâšišak kî natotamawewak kici wîhkwacihikocik, pišiškw mâka kî pâhpiliw anihi wîhtikôskwewa.

Ekâ kâ nahâpit ana kiše-iskwew mešakwani-kîšikâw kî kakwetinamwew ocihcîliw nâpešiša e natawâhât tepi-tâhcipolikwe. Peyakwâw oškaniškîšiliw kâ miskahk ana nâpešiš ante kipahotôwikamikohk, ewakwânimeliw kâ nîminamawât kâ peci-natawâhikot. Kâ kakwetinwât mâka animeliw oskaniliw, kî itelimew eško e osâmi-paskewelici anihi. Eko kâ ititisot, “Âta kâ ašamâkaniwit nâpešiš môla wî tâhcipow.” Tâpwe kî pômehew ana wîhtikôskwew.

Eko kâ kekišepâyâlik kî itašawâtew iškwešiša kici pîhtiteyâhtawîlici ante iškotehkânihk kici natawâhtâlici tepihkolelikwe iškoteliw. Iškwešiš mâka kî kakwecimew, “Tâni pâhtiteyâhtawîyân ante iškotehkânihk?”

Kâ kišiwâsit ana wîhtikôskwew kî iskwâhtawîw kici wâpahtilât tâni kici natawâhtâlici iškoteliw. Kîtahtawel mâka iškwešiš kî pîhtite-kâhtinew anihi maci-iskwewa ante iškotehkânihk.

Aniki awâšišak kî sâkaškinatâwak opwâkitimiwâwa kâ ohci-mâmôškinamwâcik omîšakisîwiniliw anihi wîhtikôskwewa eko kâ kîwecik. Pešoc mâka kî matâpewak ante e alakaškâkamâlik. Anta mâka šišôtew kî ihtâliwa wâpisiwa kâ mišikitilici kâ naskomolici kici âšôholikocik. Keka kî mâtâmewak kâ nîšicik animeliw meskanâliw kâ kiskelihtahkik.

Kî ohcikawâpiw ana onôtâhtikwew e ispihci-milwâtahk mîna e ohci-wâpamât ot awâšimiša. šay mâka kî kihcitišahwew wîwa kâ ohci-kiskelimât tâni e ispihci-macihtwâlici. Kî milwelihtamwak ana onôtâhtikwew e ispihci-pimâtisicik e pimâcihowâkewâcik animeliw omîšakisîwiniliw nehi wîhtikôskwewa.