ᓂᑖᓂᔅ ᐁ ᐧᐄᒋ ᓇᑕᐧᐃᐦᔦᐧᐁᒥᑦ

Spruce_Grouse_(Falcipennis_canadenis)_RWD
ᑕᐧᑳᒋᓐ᙮ ᓈᔥᒡ ᒫᒃ ᓂᒥᐧᔦᔨᐦᑕᒸᓐ ᐊᓄᐦᒌᔥ ᐁ ᐧᐄᒉᐧᐃᑦ ᓂᑖᓂᔅ ᐁ ᓈᓇᑕᐧᐃᐦᔦᐧᐁᐸᔨᔮᓐ᙮ ᓂᔮᓈᓀᐧᐃᐱᐳᐧᓀᓯᐤ ᓂᑖᓂᔅ, ᓂᓃᔥᑕᒨᔖᓐ ᑲᔭᐹ᙮ ᓂᑦᐊᔭᒥᐦᐃᑐᓈᓐ ᒣᐧᑳᒡ ᐁ ᐸᐹᒥᐸᔨᔮᐦᒡ, ᐁ ᒥᐧᔦᔨᐦᑕᒫᐦᒡ ᓀᔥᑦ ᐁ ᐧᐋᓭᔅᐧᑲᓂᔑᔮᐦᒡ᙮

ᓴᔅᒋᑯᒡ ᒉᐱᐦᑕᐧᐁᔮᓐ ᐁ ᐧᐋᐸᒪᐧᑳᐤ ᒥᔥᑎᑯᐦᔦᐧᐊᒡ ᐁ ᓈᓃᐸᐧᐃᐧᑖᐤ ᐊᓐᑌ ᐅᐦᐱᒣᔅᑲᓇᐤ᙮ ᐁᒄ ᒉᐱᐦᒋᐸᔨᐦᑖᔮᓐ ᓅᑖᐹᓐ ᐯᐦᑳᒡ ᒉᒌ ᑲᐹᔮᐦᒡ ᐁ ᐧᐄ ᑲᐧᑫ ᓂᐸᐦᐊᐧᑳᐤ᙮ ᐹᐦᒋᐱᐦᐧᑫᔮᓐ ᐅᑖᐹᓂᐦᒡ ᐁ ᐅᐦᐱᒣ ᓃᐸᔅᑯᔮᐦᒡ᙮ ᐁᒄ ᐧᐁᔮᔅᑯᓂᒉᔮᓐ ᐯᔭᒄ ᐱᔦᐤ ᐁ ᐧᐄ ᐹᔅᒋᓱᒃ᙮ ᒫᔅᑯᐦᐅᒃ! ᐧᐁᐦᐸᐦᐅᐧᑖᐤ ᒫᒃ ᐊᓂᒌ ᑯᑕᑲᒡ᙮ ᓂᓈᑖᔨᐤᐦ ᐊᓂᔨᐤᐦ ᐱᔦᐤᐦ ᑳ ᐹᔅᒋᐧᓵᒪᒃ ᒉ ᒦᔭᒃ ᓂᑖᓂᔅ ᒉᒌ ᑕᐦᑯᓈᑦ᙮

ᓴᔅᒋᑯᒡ ᒫᒃ ᓂᑌᐧᐹᑎᒄ ᓂᑖᓂᔅ ᐁ ᐃᐧᑌᑦ, ᓅᐦᑖ! ᐁᔥᒄ ᐃᔨᓃᐧᐃᐤ ᐆᐦᐁ ᐱᔦᐤ!

ᐊᓄᐦᒌᔥ ᒫᒃ ᐁ ᒫᒥᑐᓀᔨᐦᑕᒧᒃ ᐊᓂᔨᐤ, ᓂᐧᐊᐧᐃᔭᑌᔨᐦᑕᐧᒫᓐ᙮ ᒣᐧᑳᒡ ᒫᒃ ᑳ ᑌᑆᔑᑦ, ᒥᒄ ᓂᒌ ᒫᒥᑐᓀᔨᒫᐧᐊᒡ ᑯᑕᑲᒡ ᐱᔦᐧᐊᒡ ᑳ ᑯᑖᐧᐋᔅᑯᐦᔮᐧᑖᐤ᙮ ᓇᒪᐐᔾ ᓅᐦᒋ ᐃᔅᐱᔒᐙᓐ ᒉᒌ ᐱᓯᔅᑳᑕᒃ᙮

ᒫᒫᐦᒋᑯᓐ ᒥᒃ ᐁᑳ ᒉ ᐅᐦᒋ ᐅᐦᐸᐦᐅᑦ! ᓂᑦᐃᑖᐤ ᐁ ᑯᑖᐧᐋᔅᑯᐦᐊᒫᓐ ᒉᒌ ᓅᓱᓀᐦᐅᐧᑳᐤ ᐊᓂᒌ ᑯᑕᑲᒡ ᐱᔦᐧᐊᒡ᙮ ᐯᐦᑳᒌᐤ ᒫᒃ ᐁ ᐯᒋ ᓅᓱᓀᐦᐅᑦ ᓂᑖᓂᔅ᙮

ᒉᒃ ᐧᐃᔮᐸᒪᒃ ᐁ ᐊᑯᓰᑦ ᐯᔭᒄ ᒥᔥᑎᑯᐦᔦᐤ ᐊᓂᑌ ᓭᓭᑳᐦᑎᑯᐦᒡ᙮ ᐁᑳᐧᐄᔾ ᐋᐦᒌ! ᓂᑦᐃᑖᐤ ᓂᑖᓂᔅ ᐁ ᐧᐄ ᐹᔅᒋᐧᓵᒪᒃ᙮ ᐯᐦᒋᔑᐦᒃ ᐊᓂᐦᐁ ᐱᔦᐤ ᐁ ᐹᔅᒋᓱᒃ, ᓇᒪᐐᔾ ᒫᒃ ᓅᐦᒋ ᓂᐸᐦᐋᐤ᙮ ᐋᑕ ᒫᒃ ᐁ ᒥᔣᑲᓂᐦᑳᑕᒃ, ᒋᐦᒋᐸᐦᑖᐤ ᔮᐱᒡ᙮ ᓂᔮᒋᐸᐦᐊᒃ ᐊᓂᐦᐁ ᒥᔣᑲᓐ ᐁᒄ ᐹᒥᐧᑫᓇᒃ ᐁ ᑳᐦᒋᑎᓇᒃ᙮ ᐧᐁᑎᓈᑦ ᐊᓂᔨᐤᐦ ᐱᔦᐤᐦ ᓂᑖᓂᔅ ᐁ ᒥᔯᔨᐦᑕᐦᒃ ᓀᔥᑦ ᐋᔥ ᐁᑳ ᐊᔮᐦᒌᔨᒡᐦ ᓀᔨᐤᐦ ᐱᔦᐤᐦ ᓃᔥᑕᒻ ᑳ ᑕᐦᑯᓈᑦ᙮ ᓂᔮᓇᑕᐧᐋᐸᒪᒋᐦᐧᑖᐤ ᒫᒃ ᑯᑕᑲᒡ ᐱᔦᐧᐊᒡ ᐊᓂᑌ ᐁ ᐊᔭᐱᐧᑖᐤ᙮ ᐁᔥᐧᑳ ᐹᐦᐹᔅᒋᓱᐧᑳᐤ, ᓂᐧᐄᑕᐱᒥᑐᓈᓐ ᓂᑖᓂᔅ ᐊᓂᑌ ᒧᔥᑕᔅᑲᒥᒡ ᐁ ᐹᐦᐸᔥᑯᐱᒋᒉᔮᐦᒡ᙮ ᓴᔅᒋᑯᒡ ᔑᔮᐧᐹᔅᐧᑫᔮᔥᑕᐧᐁᑦ ᐲᓯᒽ᙮ ᓈᔥᑖᐺ ᒋᔮᒣᔨᐦᑖᐧᑲᓐ᙮

ᒨᔥ ᓂᑲ ᑲᓄ ᒋᔅᒋᓯᓐ ᑳ ᐃᔅᐱᔑ ᒥᐧᔮᔑᒡ ᓀ ᒌᔑᑳᐤ᙮ ᐊᓄᐦᒌᔥ ᒫᒃ, ᐁᔥᒄ ᓵᑲᔥᒋᓀᐤ ᓂᑌᐦᐄ ᓵᒋᐦᐃᐧᐁᐧᐃᓐ ᐅᐦᒋ ᐁ ᒫᒥᑐᓀᔨᐦᑕᒧᒃ ᑳ ᐧᐄᒋ ᓇᑕᐧᐃᐦᔦᐧᐁᒥᑦ ᓂᑖᓂᔅ ᐊᓂᔨᐤ ᑳ ᑕᐧᑳᒋᓂᔨᒡ᙮

Nitânis e wîci-natawilewemit

Spruce_Grouse_(Falcipennis_canadenis)_RWD
Takwâkin. Nâspic mâka ni milwelihten anohc e wîcewit nitânis e nânatawilewepaliyân. Niyânânewipiponesiw nitânis. Ewako ni nîštamôšân. Nit ayamihitonân mekwâc e papâmipaliyâhk, e milwelihtamâhk nešta e wâseskwanišiyâhk.

Sascikoc kepihtaweyân e wâpamakik mištikolewak e nânîpawicik ante ohpimeskanaw. Eko kepihcipalihtwâyân nit ocâpânišiš pehkâc kici kapâyâhk e wî kakwe-nipahakik. Pâhcipihkweyân ocâpânišišihk e ohpime-nîpaskoyâhk. Eko welâskonikeyân peyakw pilew e wî pâskisok. Mâskohok! Wehpahocik mâka aniki kotakiyak. Ni nâtimâwa anihi pilewa kâ pâskisomaki kici mîlak nitânis kici tahkonât.

Sascikoc mâka ni tepwâtikw nitânis e itwet, “Nôhtâ! Eškwa ililîwiw awa pilew!”

Anohc mâka e mâmitonelihtamok aniheliw ni wawiyatelihtamwân. Mekwâc mâka kâ tepwâšit, piko nikî mâmitonelimâwak kotakiyak pilewak kâ kotâwâskolâcik. Môla nikî ohci-ispihcîwân kici pisiskâtak.

“Mâmâhcikon piko ekâ ke ohci-ohpahot!” Nit itâw e kotâwâskohamân kici nôsonehokik aniki kotakiyak pilewak. Pehkâcîw mâka e peci-nôsonehot nitânis.

Keka wiyâpamak e akosît peyakw mištikolew ante sesekâhtikohk. “Ekâwîla âhcîh!” nit itâw nitânis e wî pâskisomaki.  Pehkišihk ana pilew e pâskisok, môla mâka nit ohci-nipahâw. Âta mâka e mišwâkanihkâtak, kihcipahtâw keyâpac. Niyâcipahak ana mišwâkan eko pâmikwenak e kâhcitinak. Wetinât anihi pilewa nitânis e milwelihtahk nešta âšay ekâ ayâhcîlici nehi pilewa nîštam kâ tahkonât. Niyânatawâpamakihcik kotakiyak pilewak ante e ayapicik. Eškwâ-pâhpâskisokik ni wîtapimitonân nitânis ante moštaskamik e pâhpaškopicikeyâhk. Sascikoc šiyâpwâskweyâštawet pîsimw. Tâpwe kayâmelihtâkwan.

Môšak nika kano-kiskisin kâ ispihci-milwâšihk nema kîšikâhk. Anohc mâka, eškwa sâkaškinew nitehiy sâkihiwewin ohci e mâmitonelihtamok kâ wîci-natawilewemit nitânis animeliw kâ takwâkinilik.