ᐯᔭᒀᐤ ᒌ ᐃᐦᑖᐗᒡ ᓂᔥᑐ ᒪᔅᑯᒡ ᑳ ᐯᔭᑰᑌᐎᓰᑣᐤ᙮ ᐊᓐ ᑳ ᐅᐦᑖᐐᒫᐎᑦ ᒌ ᒥᔑᒋᑎᐤ᙮ ᐊᓐ ᒫᒃ ᑳ ᐅᑳᐐᒫᐎᑦ ᓇᐗᒡ ᒌ ᒥᔑᒋᑎᔑᐤ᙮ ᐊᓐ ᒫᒃ ᑳ ᐊᐙᔑᔒᐎᑦ ᒌ ᐊᐱᔒᔑᔑᐤ᙮ ᐊᓂᒌ ᒪᔅᑯᒡ ᒌ ᐊᔮᐗᒡ ᑳ ᐊᐱᔖᔑᔨᒡ ᐙᔅᑳᐦᐃᑲᓂᔑᔨᐤ ᐊᓂᑌ ᓅᐦᒋᒦᐦᒡ᙮ ᒣᔕᑯᒥ ᒌᔑᑳᐤ ᑳ ᐗᓂᔥᑳᑣᐤ ᒨᔥ ᐯᔭᑾᓐ ᒌ ᐊᔨᐦᑎᐗᒡ, ᑳ ᐗᐌᔭᐱᑣᐤ ᒫᒃ ᒌ ᒦᒋᐗᒡ ᐊᔫᒥᓈᐴᔨᐤ᙮
ᐯᔭᒀᐤ ᐁ ᓃᐱᓂᔨᒡ ᐁ ᒉᒋᔐᐹᔮᔨᒡ, ᐊᓐ ᑳ ᐅᑳᐐᒫᐎᑦ ᒌ ᓰᑲᐦᐊᒻ ᐅᑦ ᐊᔫᒥᓈᐴᒥᐙᐤ᙮ ᐌᓵ ᒋᔑᑌᐤ! ᒌ ᐃᑗᐤ ᐊᓐ ᒪᔥᑯᔑᔥ ᐁ ᑯᒋᔥᑕᐦᒃ ᐊᓂᔨᐤ ᐅᑦ ᐊᔫᒥᓈᐴᒻ᙮ ᑕᐦᑲᔥᑖᑖᐤ ᐱᑕᒫ᙮ ᒌ ᐃᑗᐤ ᐊᓐ ᑳ ᐅᐦᑖᐐᒫᐎᑦ ᐁ ᑯᒋᔥᑕᐦᒃ ᐊᓂᔨᐤ ᐅᑦ ᐊᔫᒥᓈᐴᒻ᙮ ᐁᒄ ᒫᒃ ᐁ ᐃᔅᐱᔑ ᒋᔖᔥᑌᔨᒡ ᒌ ᐗᔦᔨᐦᑕᒧᒡ ᐊᓂᒌ ᒪᔅᑯᒡ ᒉ ᓇᑕᐎ ᐸᐹᒧᐦᑌᑣᐤ ᐁ ᐊᑎ ᑕᐦᑲᔥᑌᔨᒡ ᐅᒦᒋᒥᐙᐤ᙮
ᒣᒀᒡ ᐁ ᐸᐹᒧᐦᑌᔨᑣᐤᐦ ᐊᓂᔨᐤᐦ ᒪᔅᑾ, ᐃᔥᑴᔑᔥ ᐌᓵᐙᔨᐦᑴᑦ ᑳ ᐃᔑᓂᐦᑳᓱᑦ ᒌ ᐸᐹ ᐯᔭᑯᐦᑌᐤ ᐊᓂᑌ ᓅᐦᒋᒦᐦᒡ᙮ ᐋᑕ ᒫᒃ ᐋᔥ ᑳ ᒉᒋᔐᐹᓀᐦᑴᑦ ᐊᓐ ᐃᔥᑴᔑᔥ, ᔮᐱᒡ ᒌ ᔒᐗᑌᐤ᙮ ᑳ ᐙᐸᐦᑕᒸᑦ ᐅᐙᔅᑳᐦᐃᑲᓂᒥᔨᐤ ᐊᓂᔨᐤᐦ ᒪᔅᑾ, ᒌ ᐃᑌᔨᐦᑕᒻ ᒉᒌ ᒥᔅᑲᐦᒃ ᒉᒀᔨᐤ ᒉᒌ ᒦᒋᑦ᙮ ᒌ ᓈᑌᐤ ᐃᔥᒀᐦᑌᒻᐦ ᐁᒄ ᑳ ᐹᐦᐹᐗᐦᐙᑦ᙮ ᔮᐱᒡ ᒫᒃ ᒌ ᐲᐦᑐᒉᐤ ᐌᓵᐙᔨᐦᑴᑦ ᐋᑕ ᐁᑳ ᐅᐦᒋ ᐯᒋ ᐋᐸᐦᐙᑲᓂᐎᔨᒡᐦ ᐊᓂᔨᐤᐦ ᐃᔥᒀᐦᑌᒻᐦ᙮
ᐃᔥᑯᑕᒃ ᑳ ᐲᐦᑐᒉᑦ ᒌ ᐙᐸᐦᑕᒻ ᓂᔥᑐ ᐅᔮᑲᓐᐦ ᐁ ᐊᔥᑌᔨᒀᐤ ᐊᓂᑌ ᒦᒋᓱᓈᐦᑎᑯᐦᒡ᙮ ᑖᐺ ᒌ ᔒᐗᑌᐤ ᐌᓵᐙᔨᐦᑴᑦ᙮ ᒉᒃ ᒌ ᐗᔦᔨᐦᑕᒻ ᒉ ᑯᒋᔥᑕᐦᒃ ᐊᓂᔨᐤ ᐊᔫᒥᓈᐴᔨᐤ ᐊᓂᑌ ᑳ ᐊᔥᑌᔨᒡ ᐊᓂᔨᐤ ᐅᔮᑲᓂᔨᐤ ᑳ ᒥᔖᔨᒡ᙮ ᐌᓵ ᒋᔑᑌᐤ! ᒌ ᐃᑗᐤ᙮ ᐁᒄ ᒦᓐ ᑳ ᐅᐦᒋ ᒦᒋᓱᑦ ᐊᓂᔨᐤ ᐅᔮᑲᓂᔨᐤ ᓇᐗᒡ ᑳ ᒥᔖᔑᔨᒡ᙮ ᐆ ᒫᒃ ᐌᓵ ᑕᐦᑳᐤ! ᒌ ᐃᑗᐤ᙮ ᐁᒄ ᒫᐦᒋᑌᔾ ᑳ ᐅᐦᒋ ᒦᒋᓱᑦ ᐊᓂᔨᐤ ᐅᔮᑲᓂᔑᔨᐤ ᑳ ᐊᐱᔖᔑᔨᒡ᙮ ᐁᐗᑰ ᒫᒃ ᓀᐦᐃᔥᑕᒫᓐ! ᒌ ᐃᑗᐤ ᒣᒀᒡ ᐁ ᒦᒋᓱᑦ᙮
ᑳ ᐃᔥᒀ ᒦᒋᓱᑦ ᐌᓵᐙᔨᐦᑴᑦ, ᒌ ᐐ ᐊᔯᐱᐤ᙮ ᓂᔥᑐ ᑌᐦᑕᐱᐎᓐᐦ ᒌ ᐙᐸᐦᑕᒻ, ᐁᒄ ᑳ ᑌᐦᑕᐱᑦ ᐊᓂᑕ ᐊᓂᔨᐤ ᑳ ᒥᔖᔨᒡ᙮ ᐌᓵ ᒪᔥᑲᐙᐤ ᐆ! ᒌ ᐃᑗᐤ᙮ ᐁᒄ ᒦᓐ ᐊᓂᑕ ᓇᐗᒡ ᑳ ᒥᔖᔑᔨᒡ ᑳ ᑌᐦᑕᐱᑦ᙮ ᐁᒄ ᑳ ᐃᑗᑦ, ᐆ ᒫᒃ ᐌᓵ ᒪᔫᑳᐤ! ᐁᒄ ᒫᐦᒋᑌᔾ ᐊᓂᑕ ᑳ ᐊᐱᔖᔑᔨᒡ ᑳ ᑌᐦᑕᐱᑦ᙮ ᐁᐗᑰ ᒫᒃ ᓀᐦᐊᐱᔮᓐ! ᒌ ᐃᑗᐤ᙮ ᒥᒄ ᒫᒃ ᒌ ᐲᑯᔥᑲᒻ ᐊᓂᔨᐤ ᑌᐦᑕᐱᐎᓂᔑᔨᐤ ᐁ ᐃᔅᐱᔑ ᑯᓯᑯᑎᑦ᙮
ᐁᒄ ᑳ ᐃᔅᒀᐦᑕᐐᑦ ᐌᓵᐙᔨᐦᑴᑦ ᐁ ᐊᑎ ᐊᔦᔅᑯᓰᑦ᙮ ᐁᒄ ᐊᓂᑌ ᐃᔥᐱᒥᐦᒡ ᑳ ᒥᔅᑲᐦᒃ ᓂᔥᑐ ᓂᐯᐎᓐᐦ᙮ ᓃᔥᑕᒻ ᐊᓂᑕ ᐊᓂᔨᐤ ᑳ ᒥᔖᔨᒡ ᒌ ᐗᐌᔨᔑᓄ᙮ ᐌᓵ ᓂ ᒑᐦᑳᔅᑴᔑᓂᓐ! ᒌ ᐃᑗᐤ᙮ ᐁᒄ ᒦᓐ ᐊᓂᑕ ᑳ ᒥᔖᔑᔨᒡ ᓂᐯᐎᓂᔨᐤ ᑳ ᐗᐌᔨᔑᐦᒃ᙮ ᑳ ᐃᑗᑦ, ᐌᓵ ᓂᑦ ᐊᒋᑎᔑᓂᓐ! ᐁᒄ ᒫᐦᒋᑌᔾ ᐊᓂᑕ ᑳ ᐊᐱᔖᔑᔨᒡ ᓂᐯᐎᓂᔑᔨᐤ ᑳ ᐗᐌᔨᔑᐦᒃ᙮ ᐁᐗᑰ ᒫᒃ ᓀᐦᐃᔑᓂᔮᓐ! ᒌ ᐃᑗᐤ᙮ ᐁᒄ ᑳ ᑲᐎᐦᑯᔑᑦ᙮
ᑳ ᑕᑯᔑᐦᒀᐤ ᐊᓂᒌ ᓂᔥᑐ ᒪᔅᑯᒡ, ᒌ ᐱᓯᔅᑳᐸᐦᑕᒧᒡ ᐁ ᐲᑐᔑᓈᑾᓂᔨᒡ ᐅᐙᔅᑳᐦᐃᑲᓂᒥᐙᐤ᙮ ᐁᒄ ᑳ ᐃᑗᑦ ᐊᓐ ᑳ ᐅᐦᑖᐐᒫᐎᑦ, ᒌ ᑯᒋᔥᑕᒨᑐᒉ ᐊᐌᓐ ᓂᑦ ᐊᔫᒥᓈᐴᒥᔨᐤ! ᐁᒄ ᑳ ᐃᑗᑦ ᐊᓐ ᑳ ᐅᑳᐐᒫᐎᑦ, ᒌ ᑯᒋᔥᑕᒨᑐᒉ ᓀᔥᑕᓃᔾ ᐊᐌᓐ ᓂᑦ ᐊᔫᒥᓈᐴᒥᔨᐤ! ᐁᒄ ᑳ ᐃᑗᑦ ᐊᓐ ᒪᔥᑯᔑᔥ, ᒌ ᒦᒌᑐᒉ ᐊᐌᓐ ᓂᑦ ᐊᔫᒥᓈᐴᒥᔨᐤ ᓃᔾ! ᒌ ᒋᑖᑲᓂᐎᐤ ᒫᒃ!
ᐃᔥᑯᑕᒃ ᑳ ᐙᐸᐦᑕᐦᒃ ᑳ ᒥᔖᔨᒡ ᐅᑌᐦᑕᐱᐎᓐ ᐊᓐ ᐅᐦᑖᐐᒫᐤ ᒌ ᐃᑗᐤ, ᒌ ᑌᐦᑕᐲᑐᒉ ᐊᐌᓐ ᓂ ᑌᐦᑕᐱᐎᓂᐦᒡ! ᐁᒄ ᑳ ᐃᑗᑦ ᐊᓐ ᐅᑳᐐᒫᐤ, ᒌ ᑌᐦᑕᐲᑐᒉ ᓀᔥᑕᓃᔾ ᐊᐌᓐ ᓂ ᑌᐦᑕᐱᐎᓂᐦᒡ! ᐁᒄ ᑳ ᐃᑗᑦ ᐊᓐ ᒪᔥᑯᔑᔥ, ᓀᔥᑕᓃᔾ ᒌ ᑌᐦᑕᐲᑐᒉ ᐊᐌᓐ ᓂ ᑌᐦᑕᐱᐎᓂᐦᒡ! ᒌ ᐲᑯᔥᑭᑳᑌᐤ ᒫᒃ! ᐁᒄ ᐯᐦᑳᒡ ᑳ ᐃᔅᒀᐦᑕᐐᑣᐤ ᐊᓂᒌ ᒪᔅᑯᒡ᙮
ᒌ ᓃᐹᑐᒉ ᐊᐌᓐ ᓂ ᓂᐯᐎᓂᐦᒡ! ᒌ ᐃᑗᐤ ᐊᓐ ᑳ ᐅᐦᑖᐐᒫᐎᑦ᙮ ᒌ ᓂᐹᑐᒉ ᓀᔥᑕᓃᔾ ᓂ ᓂᐯᐎᓂᐦᒡ! ᒌ ᐃᑗᐤ ᐊᓐ ᑳ ᐅᑳᐐᒫᐎᑦ᙮ ᐁᒄ ᑳ ᐃᑗᑦ ᐊᓐ ᒪᔥᑯᔑᔥ, ᓀᔥᑕᓃᔾ, ᐁᔥᒄ ᒫᒃ ᓂᐹᐤ!
ᐁᒄ ᑳ ᐅᔅᐹᐌᒫᑲᓂᐎᑦ ᐌᓵᐙᔨᐦᑴᑦ᙮ ᑳ ᐙᐸᒫᑦ ᒫᒃ ᐊᓂᔨᐤᐦ ᒪᔅᑾ, ᒌ ᐗᔭᐐ ᒀᔥᑯᐦᑎᐤ ᐊᓂᑌ ᐅᐦᒋ ᐸᔅᐹᐱᐎᓂᐦᒡ, ᐁᒄ ᑳ ᐅᔑᒧᑦ᙮ ᐊᓂᒌ ᒫᒃ ᒪᔅᑯᒡ ᓇᒪᐐᔾ ᒦᓐ ᐅᐦᒋ ᐙᐸᒣᐗᒡ ᐊᓂᔨᐤᐦ ᐌᓵᐙᔨᐦᑴᔨᒡᐦ᙮
The above is a Southern East Cree translation of Goldilocks, a fairytale of English origin that was recorded by Robert Southey and first published in 1837.
Kepin's Cree Language Blog 
Keep up the good work !!! I especially like to see the children’s stories translated to Cree, they sound so nice 🙂
LikeLike