ᐋᔭᐦᑯᓈᐎ ᓈᐯᔑᔥ

f3b7a53d193a825261825088cc84d580

ᒌ ᐃᐦᑖᐗᒡ ᒋᔐᐃᔥᑴᔥ ᓀᔥᑦ ᒋᔐᐃᔨᓂᐤ ᑳ ᐐᒋᑣᐤ ᐁ ᐊᐱᔖᔑᔨᒡ ᐙᔅᑳᐦᐃᑲᓂᔨᐤ ᐊᓂᑌ ᒌᑳᔅᒄ᙮ ᒋᐸ ᒌ ᒥᔯᔨᐦᑕᒧᒡ, ᒥᒄ ᒫᒃ ᒌ ᐅᐦᒋᐦᐃᑯᐗᒡ ᒉᒀᔨᐤ – ᓇᒪᐐᔾ ᒌ ᐊᔮᐌᐗᒡ ᐊᐙᔑᔕ ᐋᑕ ᓈᔥᒡ ᐁ ᒌ ᓇᑕᐌᔨᒫᑣᐤ᙮ ᐯᔭᒀᐤ, ᑳ ᐋᔭᐦᑯᓈᐦᒉᑦ ᐊᓂᐦᐁ ᒋᔐᐃᔥᑴᔥ, ᒌ ᐃᑎᔗᐤ ᐅᑦ ᐋᔭᐦᑯᓈᒻᐦ ᒬᐦᒡ ᓈᐯᔑᔑᐦᒡ ᒉᒌ ᐃᔑᓈᑯᓯᔨᒡᐦ᙮ ᐁᒄ ᑳ ᐲᐦᑖᐱᔅᑲᐦᐙᑦ ᐊᓂᔨᐤᐦ ᐅᑦ ᐋᔭᐦᑯᓈᒻᐦ ᐊᓂᑌ ᒋᔖᐱᔅᒋᓵᐙᓂᐦᒡ᙮ ᒦᓐ ᒫᒃ ᑳ ᐋᐸᐦᐙᑦ ᒋᔖᐱᔅᒋᓵᐙᓐᐦ ᐁ ᓇᑕᐙᐦᐋᑦ ᐊᓂᔨᐤᐦ ᐋᔭᐦᑯᓈᐎ ᓈᐯᔑᔕ, ᒌ ᐅᐦᒋ ᐗᔭᐐ ᒀᔥᑯᐦᑎᔨᐤᐦ ᐁᒄ ᑳ ᐊᑎ ᒋᐦᒋᐸᐦᑖᔨᒡᐦ᙮

ᒌ ᑌᑆᑌᐤ ᐊᓂᐦᐁ ᒋᔐᐃᔥᑴᔥ ᐊᓂᔨᐤᐦ ᐅᓈᐯᒻᐦ ᒉ ᓅᓱᓀᐦᐙᑣᐤ᙮ ᓇᒪᐐᔾ ᒫᒃ ᒌ ᐅᐦᒋ ᐊᑎᒥᓀᐦᐌᐗᒡ᙮ ᐁᒄ ᑳ ᐅᑎᐦᑖᑦ ᐊᓂᐦᐁ ᐋᔭᐦᑯᓈᐎ ᓈᐯᔑᔥ ᒥᐦᒉᑦ ᐸᐗᐦᐃᒉᓯᐤᐦ ᐊᓂᑌ ᐸᐗᐦᐃᒉᐎᑲᒥᑯᐦᒡ᙮ ᐁᒄ ᑳ ᑌᑆᑖᑦ ᒣᒀᒡ ᐁ ᒪᔮᐎᐸᐦᑖᑦ ᐁ ᐃᑖᑦ,

ᓂᒌ ᓇᑲᒋᐸᐦᐋᐗᒡ ᒋᔐᐃᔥᑴᔥ ᓀᔥᑦ ᒋᔐᐃᔨᓂᐤ᙮ ᒉᔥᑕᒌᔭᐙᐤ ᒋᑲ ᒌ ᓇᑲᒋᐸᐦᐃᑎᓈᐙᐤ!

ᐁᒄ ᑳ ᐊᑎ ᓅᓱᓀᐦᐙᑣᐤ ᑳ ᒥᐦᒉᑎᑣᐤ ᐸᐗᐦᐃᒉᓯᐗᒡ᙮ ᐋᑕ ᒫᒃ ᑳ ᒋᔒᐸᐦᑖᑣᐤ, ᓇᒪᐐᔾ ᒌ ᐅᐦᒋ ᐊᑎᒥᓀᐦᐌᐗᒡ᙮ ᐁᒄ ᑳ ᐅᑎᐦᑖᑦ ᐊᓂᐦᐁ ᓈᐯᔑᔥ ᒥᐦᒉᑦ ᓅᑕᔥᑯᔑᐌᓯᐤᐦ ᐊᓂᑌ ᓂᐦᑕᐎᒋᐦᒋᑲᓂᐦᒡ᙮ ᐁᒄ ᑳ ᑌᑆᑖᑦ ᒣᒀᒡ ᐁ ᒪᔮᐎᐸᐦᑖᑦ ᐁ ᐃᑖᑦ,

ᓂᒌ ᓇᑲᒋᐸᐦᐋᐗᒡ ᒋᔐᐃᔥᑴᔥ, ᒋᔐᐃᔨᓂᐤ, ᓀᔥᑦ ᐸᐗᐦᐃᒉᓯᐗᒡ᙮ ᒉᔥᑕᒌᔭᐙᐤ ᒋᑲ ᒌ ᓇᑲᒋᐸᐦᐃᑎᓈᐙᐤ!

ᐁᒄ ᑳ ᐊᑎ ᓅᓱᓀᐦᐙᑣᐤ ᑳ ᒥᐦᒉᑎᑣᐤ ᓅᑕᔥᑯᔑᐌᓯᐗᒡ᙮ ᓇᒪᐐᔾ ᒫᒃ ᒌ ᐅᐦᒋ ᐊᑎᒥᓀᐦᐌᐗᒡ᙮ ᐁᔥᒄ ᐁ ᐱᒥᐸᐦᑖᑦ ᐊᓂᐦᐁ ᓈᐯᔑᔥ ᒌ ᐅᑎᐦᑌᐤ ᒥᔥᑐᔀ᙮ ᐁᒄ ᑳ ᑌᑆᑖᑦ ᐁ ᐃᑖᑦ,

ᓂᒌ ᓇᑲᒋᐸᐦᐋᐗᒡ ᒋᔐᐃᔥᑴᔥ, ᒋᔐᐃᔨᓂᐤ, ᐸᐗᐦᐃᒉᓯᐗᒡ, ᓀᔥᑦ ᓅᑕᔥᑯᔑᐌᓯᐗᒡ᙮ ᒉᔥᑕᒌᔾ ᒋᑲ ᒌ ᓇᑲᒋᐸᐦᐃᑎᓐ!

ᐋᑕ ᒫᒃ ᑏᐌᐦᒡ ᑳ ᒋᐦᒋᐸᐦᑖᑦ ᐊᓂᐦᐁ ᒥᔥᑐᔅ, ᓇᒪᐐᔾ ᒌ ᐅᐦᒋ ᐊᑎᒥᓀᐦᐌᐤ᙮ ᐁᒄ ᑳ ᐅᑎᐦᑖᑦ ᐊᓂᐦᐁ ᓈᐯᔑᔥ ᑰᐦᑰᔕ᙮ ᐁᒄ ᑳ ᑌᑆᑖᑦ ᐁ ᐃᑖᑦ,

ᓂᒌ ᓇᑲᒋᐸᐦᐋᐗᒡ ᒋᔐᐃᔥᑴᔥ, ᒋᔐᐃᔨᓂᐤ, ᐸᐗᐦᐃᒉᓯᐗᒡ, ᓅᑕᔥᑯᔑᐌᓯᐗᒡ, ᓀᔥᑦ ᒥᔥᑐᔅ᙮ ᒉᔥᑕᒌᔾ ᒋᑲ ᒌ ᓇᑲᒋᐸᐦᐃᑎᓐ!

ᐋᑕ ᒫᒃ ᑳ ᒋᔒᐸᐦᑖᑦ ᑰᐦᑰᔥ, ᓇᒪᐐᔾ ᒌ ᐅᐦᒋ ᐊᑎᒥᓀᐦᐌᐤ᙮ ᐁᔥᒄ ᐁ ᐱᒥᐸᐦᑖᑦ ᐊᓂᐦᐁ ᓈᐯᔑᔥ ᒌ ᐅᑎᐦᑌᐤ ᒪᐦᒉᔑᐤᐦ᙮ ᐁᒄ ᑳ ᑌᑆᑖᑦ ᐁ ᐃᑖᑦ,

ᓂᒌ ᓇᑲᒋᐸᐦᐋᐗᒡ ᒋᔐᐃᔥᑴᔥ, ᒋᔐᐃᔨᓂᐤ, ᐸᐗᐦᐃᒉᓯᐗᒡ, ᓅᑕᔥᑯᔑᐌᓯᐗᒡ, ᒥᔥᑐᔅ, ᓀᔥᑦ ᑰᐦᑰᔥ᙮ ᒉᔥᑕᒌᔾ ᒋᑲ ᒌ ᓇᑲᒋᐸᐦᐃᑎᓐ!

ᐁᒄ ᑳ ᒋᐦᒋᐸᐦᑖᑦ ᐊᓂᐦᐁ ᒪᐦᒉᔑᐤ᙮ ᒋᔅᒉᔨᐦᑖᑯᓯᐤ ᒫᒃ ᐁ ᒋᔒᐸᐦᑖᑦ ᒪᐦᒉᔑᐤ᙮ ᒉᒃ ᒫᒃ ᒌ ᐅᑎᐦᑌᐤ ᐊᓂᐦᐁ ᒪᐦᒉᔑᐤ ᐊᓂᔨᐤᐦ ᐋᔭᐦᑯᓈᐎ ᓈᐯᔑᔕ᙮ ᐁᒄ ᑳ ᐊᑎ ᒧᐙᑦ᙮

ᐁᒄ ᑳ ᐃᑗᑦ ᐊᓂᐦᐁ ᐋᔭᐦᑯᓈᐎ ᓈᐯᔑᔥ, ᐌᓵ! ᐋᐱᐦᑕᐎᑳᑦ ᓂᑦ ᐃᔅᑯᒥᑲᐎᓐ! ᐁᒄ ᒦᓐ ᑳ ᐃᑗᑦ, ᐌᓵ! ᐋᐱᐦᑕᐎᔭᐤ ᓂᑦ ᐃᔅᑯᒥᑲᐎᓐ! ᐁᒄ ᐐᐸᒡ ᒦᓐ ᑳ ᐃᑗᑦ, ᐁᒄ ᐌᓵ! ᐊᓂᑕ ᓂᑾᔮᐦᒡ ᓂᑦ ᐃᔅᑯᒥᑲᐎᓐ! ᒉᒃ ᒫᒃ ᒌ ᐃᑗᐤ, ᐁᒄ ᒫᒃ ᐁ ᒋᑕᒧᑲᐎᔮᓐ!

ᓇᒪᐐᔾ ᒫᒃ ᒦᓐ ᐐᔅᑳᑦ ᐅᐦᒋ ᐯᐦᑖᑯᓯᐤ᙮

The above is a Southern East Cree translation of The Gingerbread Boy, a fairytale first published in 1875 in the St. Nicholas Magazine by an anonymous author. Although it appears to have its origins in what is now the United States, tales of the runaway food type are common throughout much of Europe. Many retellings of the tale exist, including a Plains Cree version by the late Ida MacLeod where the characters have been reimagined in roles more relevant to Cree culture.

2 thoughts on “ᐋᔭᐦᑯᓈᐎ ᓈᐯᔑᔥ

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s